Այսօր Կոնգրեսի իր ելույթում ԱՄՆ նախագահ Բարաք Օբաման քիչ ժամանակ է հատկացրել արտաքին քաղաքական խնդիրներին` հիմնական շեշտը դնելով ներքին զարգացումների և տնտեսության վիճակի վրա:
Այդուամենայնիվ, նա խոսել է նաև Իրաքի և Աֆղանստանի մասին` ասելով, որ ԱՄՆ-ն պատրաստվում է այդ երկրների հետ երկարատև համագործակցության հիմք դնել: Նա հաստատել է, որ ԱՄՆ-ն պատրաստվում է 2011 թ. հուլիսից սկսել Աֆղանստանից իր զորքերի դուրս բերումը:
Օբաման ողջունել է իշխանափոխությունը Թունիսում. «ԱՄՆ-ն պաշտպանում է Թունիսի ժողովրդին՝ ինչպես և ցանկացած ժողովրդի, որը ձգտում է ժողովրդավարության: Այդ հյուսիսաֆրիկյան երկրի ժողովրդի կամքն ավելին ուժեղ էր, քան Թունիսի նախկին նախագահի կողմից հաստատված ռեժիմը»,- ասել է Օբաման:
Սակայն նա չի անդրադարձել Եգիպտոսում սկսված բախումներին, որոնք երեկ թայր են առել արաբական այդ երկրի տարբեր շրջաններում:
Օբամայի ելույթում անդրադարձ կար նաև Ռուսաստանի հետ հարաբերություններին: ԱՄՆ նախագահը նշել է, որ կարևոր էր Ռուսաստանի հետ «վերաբեռնման» քաղաքականությունը: Նա կարևորեց Հնդկաստանի հետ հարաբերությունների զարգացումը, իսկ Իրանի և Հյուսիսայի Կորեայի դեպքում կողմ արտահայտվեց, որ ճնշումը նրանց վրա չթուլանա:
Օբաման շեշտեց լատինաամերիկյան ուղղության կարևորրությունը ԱՄՆ համար` ասելով, որ պատրաստվում է այցելել Բրազիլիա, Սալվադոր, Չիլի:
Ընդհանուր առմամբ, Օբամայի խոսքը տևել է 61 րոպե: