«Lragir.am» կայքէջի «Ընտրացուցակները հիմնովին կեղծված են» հոդվածում հրապարակվել են Հայ Ազգային Կոնգրեսի ներկայացուցիչ Լևոն Զուրաբյանի տեսակետները` հասցեներում 10 և ավելի անձանց գրանցումների «աննորմալության», ինչպես և գոյություն չունեցող շենք-շինություններում հաշվառված ընտրողների մասին:
ՀՀ ոստիկանությունը բազմիցս պարզաբանել է նշված երևույթների պատճառները, որոնք մի շարք անձանց կողմից ներկայացվում են իրբև կեղծիքներ: Մասնավորապես` Ավետ Պողոսյանի ընտրական շտաբի կողմից համացանցում հրապարակված «անճշտությունների» առիթով ոստիկանության կողմից իրականացված ուսումնասիրության արդյունքները հրապարակվել են ոստիկանության «Police.am» կայքէջում:
Կարևորելով ոստիկանության գործունեության վերաբերյալ քաղաքացիների իրավական իրազեկվածության բարձրացման, ինչպես և ապատեղեկատվությունը բացառելու անհրաժեշտությունը, ՀՀ ոստիկանությունը վերստին պարզաբանում է.
Հասցեում 10 և ավելի անձանց հաշվառումները ոչ թե անձնագրային ծառայության հայեցողական լիազորությունն են, այլ` սեփականատերերի օրինական պահանջի արդյունքը, կամ չհասցեավորված բնակելի տարածությունների գոյությունը, որի պատճառով տարբեր ընտանիքներ հաշվառվել և հաշվառվում են միևնույն հասցեներում:
Հաշվառման գործողությունների հետ կապված իրավահարաբերությունները կարգավորվում են «Հայաստանի Հանրապետությունում բնակչության պետական ռեգիստրի համակարգ ներդնելու մասին» ՀՀ կառավարության 14.07.2005 թ. թիվ 1231-Ն որոշմամբ, որը հասցեում չբնակվելու կամ շենքերի ապամոնտաժման պատճառով բնակիչներին հաշվառումից հանելու լիազորություններ ոստիկանությանը չի վերապահել:
Եթե բնակիչները Սահմանադրությամբ և օրենքներով ամրագրված իրենց իրավունքներն ու պարտականությունները իրացնելու համար իրական բնակության վայրի հասցեն հայտնելու ցանկություն չունեն, ապա բնակչության պետական ռեգիստր վարող լիազոր մարմինն իրավասու չէ սեփական նախաձեռնությամբ որոշելու բնակչի մշտական բնակության վայրը:
ՀՀ Սահմանադրության 5-րդ հոդվածի 2-րդ մասի համաձայն՝ «Պետական եւ տեղական ինքնակառավարման մարմիններն ու պաշտոնատար անձինք իրավաuու են կատարելու միայն այնպիuի գործողություններ, որոնց համար լիազորված են Uահմանադրությամբ կամ oրենքներով»: Բնակիչների հաշվառման հետ կապված իրավահարաբերություններում ոստիկանության լիազորությունների շրջանակը նախատեսված է «Բնակչության պետական ռեգիստրի մասին» ՀՀ օրենքով:
