Չորրորդ գումարման ԱԺ-ն 2007-20012 թվականների ընթացքում ընդունել է մոտ հազար չորս հարյուր օրենք, որոնցից միայն երկու հարյուրն են հեղինակվել պատգամավորների կողմից: «Բաց հասարակության հիմնադրամներ-Հայաստանի» կազմակերպած, քաղաքական ուժերի օրենսդրական գործունեության մոնիտորինգի արդյունքների՝ այսօր կայացած ամփոփման ժամանակ այս մասին ասաց «Մանդատ» տեղեկատվական ՀԿ ներկայացուցիչ Լուսինե Վասիլյանը:
Ըստ վիճակագրության՝ ներկայացված օրինագծերից ավելի քան հարյուր իննսունը կառավարությունը համարել է անհետաձգելի, և խորհրդարանը դրանք քննարկել ու ընդունել է հատուկ կարգով: Ամբողջությամբ ընդունված օրենքներից հազար երեք հարյուրը եղել են փոփոխություններ ու լրացումներ գործող օրենքներում, իննսունչորսը «մայր» օրենքներ են:
«Վիճակագրական դիտարկումը ցույց է տալիս, որ Հայաստանում օրենքների հիմնական դարբնոցը կառավարությունն է, որը հեղինակել է ընդունված օրենքների ավելի քան ութսուն տոկոսը: Ինչ վերաբերում է քաղաքական ուժերին, ապա ամենամեծ խմբակցության՝ ՀՀԿ բոլոր պատգամավորների «կողմ» քվեարկությունների ընդհանուր հանրագումարը 23,289 է: Եթե նկատի ունենանք, որ ՀՀԿ-ն ԱԺ-ում 63 պատգամավոր ունի, ապա ստացվում է, որ միջին հաշվով նրանցից յուրաքանչյուրը երեք հարյուր հիսուներեք անգամ «կողմ» է քվեարկել: ԲՀԿ-ին բաժին է ընկնում 317 «կողմ», 1,1 «դեմ» հարաբերակցությունը: Կողմ քվեարկությունների բացարձակ ռեկորդը պատկանում է ՕԵԿ-ին. այդ կուսակցության յուրաքանչյուր պատգամավոր կողմ է քվեարկել 389 անգամ:
Խոսելով ընդդիմադիր խմբակցությունների մասին՝ պետք է նշել, որ նրանք ակտիվ են եղել հատկապես «դեմ» քվեարկությունների ժամանակ: ՀՅԴ ներկայացուցիչներից յուրաքանչյուրը դեմ է արտահայտվել 31 անգամ, «Ժառանգության» պատգամավորները՝ 36 անգամ»,- նշեց նա:
Քննարկմանը ներկա, մեդիա փորձագետ Մեսրոպ Հարությունյանը, անդրադառնալով մեդիա դաշտին վերաբերող ԱԺ գործունեությանը՝ իր հերթին նկատեց, որ «Հեռուստատեսության և ռադիոյի մասին» օրենքը բազմիցս ենթարկվել է փոփոխությունների: «Վերջին խմբագրման շուրջ լուրջ քննարկումներ եղան, սակայն այն ի վերջո ընդունվեց սկզբնական տեսքով: Մեդիայի ոլորտին վերաբերող մյուս կարևոր օրենքը զրպարտության և վիրավորանքի ապաքրեականացման մասին օրենքն էր, որը ևս լուրջ քննարկումների առարկա դարձավ՝ ընդհուպ հայտնվելով ՄԻՊ-ի և Սահմանադրական դատարանի ուշադրության կենտրոնում»,- հիշեցրեց նա:
Իրավապաշտպան, Հայաստանի Հելսինկյան կոմիտեի նախագահ Ավետիք Իշխանյանն էլ նկատեց. «ԱԺ վերջին հինգ տարիների գործունեության արդյունքում մեծապես սահմանափակվել են ցույցերի և հանրահավաքների անցկացման ազատությունները: Ինչ վերաբերում է «Արտակարգ ռեժիմի դրության մասին» օրենքին, ապա այն բավական վիճահարույց է, քանի որ գործելու լայն դաշտ է տրվում Զինված ուժերին: Սա խիստ կասկածելի օրենք է և գուցե նախապատրաստում է համապետական ընտրություններից հետո լուրջ բախումների»,- ասաց իրավապաշտպանը:
Transparency International հակակոռուպցիոն կազմակերպության գործադիր տնօրեն Վարուժան Հոկտանյանը, ուշադրություն հրավիրելով, իր իսկ խոսքով, ԱԺ կոնցեպտուալ փոփոխությունների վրա, դրանցից առանձնացրեց հատկապես տեղամասային հանձնաժողովների ղեկավար կազմի ձևավորման կարգի փոփոխությունը, դիտորդների որակավորման գործընթաց սկսելը, ինչպես նաև քվեարկության գործընթացը տեսալուսանկարահանելու թույլտվությունը: Ամփոփելով՝ նա ընդգծեց, որ քաղաքական կամքից է կախված՝ որքան Ընտրական օրենսգիրքը լավ կիրառվի, այնքան ավելի լավ ընտրություններ տեղի կունենան Հայաստանում: