Այսօր ԱՄՆ նախագահ Բարաք Օբաման ԱՄՆ Կոնգրեսում հանդես է եկել ամենամյա ելույթով, որում ամփոփել է նախորդ տարին և ներկայացրել ապագա զարգացումների իր տեսլականը:
Ելույթի սկզբում Օբաման ցույց է տվել այն աթոռը, որը պետք է զբաղեցներ վերջերս ահաբեկչի ձեռքից վիրավորված կոնգրեսական Գաբրիել Գիֆորդսը, և կոչ արել աղոթել նրա համար: Այնուհետև Օբաման անդրադարձել է ներքաղաքական զարգացումներին:
Նա երկրում իրավիճակը համեմատել է 1957թ. հետ, երբ ԽՍՀՄ-ն առաջին անգամ արբանյակ ուղարկեց տիեզերք, ինչը պատճառ դարձավ, որ ԱՄՆ-ն շեշտակի մեծացնի ներդրումները նորարարական ոլորտներում: Այս պահին էլ Օբաման կարծում է, որ ԱՄՆ-ն նմանատիպ մեկնարկ պետք է վերցնի, և ամերիկացիների այս սերունդը պետք է «տիեզերք ուղարկի իր արբանյակը»:
Նա նշել է, որ ԱՄՆ-ն պետք է առաջատար դառնա ինովացիոն տեխնոլոգիաների, կրթության և շինարարության ոլորտներում, որպեսզի աշխարհում պահպանի իր դիրքերը:
Օբաման նաև կողմ է արտահայտվել խոշոր ընկերություններին հարկային արտոնություններից զրկելու մասին օրինագծին` նշելով, որ լոբբսիտական կազմակերպությունները զգալիորեն փոփոխել են հարկային օրենսգիրքը, ինչը օգուտներ է բերել միայն մեծ ընկերություններին: Նա և՛ դեմոկրատներին, և՛ հանրապետականներին այնպիսի փոփոխությունների կոչ է արել, որոնք սողանցքներ չեն թողնի հարկերից խուսափելու համար: Իսկ դրա փոխարեն առաջարկել է իջեցնել եկամտահարկը, ինչը լրացուցիչ խթան կհանդիսանա տնտեսության համար:
Նա խոսել է նաև էներգետիկ ոլորտում բարեփոխումների մասին։ Իսկ նրա ելույթի հիմնական թեմաներից է եղել կրթության ոլորտը, որը նույնպես, ըստ նրա, զգալի վերափոխումների կարիք ունի: Օբաման նշել է, որ Սպիտակ տան համար առաջնային խնդիր է կրթության որակի բարձրացումը, և կոչ է արել վերադարձնել երկրին ամենաշատ բարձրագույն կրթություն ունեցողների առաջատարի դիրքերը:
Նա նաև խոսել է երկրի ներսում IT տեխնոլոգիաների զարգացվածության աստիճանի վերաբերյալ: Օբաման ասել է, որ ինտերնետ հասանելիությունը ԱՄՆ-ում ավելի ցածր է, քան Հարավային Կորեայում, իսկ եվրոպական երկրներն ու Ռուսաստանն ավելի շատ են գումար ներդնում ճանապարհաշինության մեջ, քան ԱՄՆ-ն: Նա նաև օրինակներ է բերել Չինաստանից և նրանց հաջողված փորձը հաշվի առնելով` նշել է, որ ԱՄՆ-ում առաջիկա 25 տարվա մեջ կառուցվելու է գերարագ երկաթգիծ, որը հասանելի կլինի ամերիկացիների 80%-ին, իսկ 98%-ին հասանելի կլինի գերարագ ինտերնետը:
Արտաքին առևտրի ծավալները մեծացնելու համար Օբամայի համար թիվ մեկ ուղղությունը Հարավարևելյան Ասիան է: Նա կոչ է արել արագ վավերացնել Հարավային Կորեայի հետ առևտրային պայմանագիրը` հույս հայտնելով, որ նմանատիպ պայմանագրեր կկնքվեն նաև Չինաստանի և Հնդկաստանի հետ:
Այս մասին գրում է CNN-ի կայքը: