Նախընտրական քարոզարշավը թատրոն ու բեմականացում է, իսկ ընտրությունների արդյունքները նախօրոք կանխորոշված են: «Առաջին լրատվական»-ի հետ զրույցում նման տեսակետ հայտնեց «Սարդարապատ» շարժման նախաձեռնող խմբի համակարգող Ժիրայր Սեֆիլյանը:
«Ափսոս, բազմաթիվ մարդիկ չլսեցին մեր հորդորները և խճճվեցին երկիրը կեղեքող համակարգի կողմից թելադրված խաղի կանոնների մեջ: Ցավալի է, որ որոշ մարդիկ, ում հարգել և հարգում ենք, մինչև մայիսի 7-ը այդ կեղտոտ ճահճից ինչ-որ չափով վնասված են դուրս գալու: Խոսքը ՀԱԿ-ի և «Ժառանգության» ներսում գտնվող որոշ անձանց մասին է: Իսկ ընդհանրապես, այդ ուժերն իրենց գործունեությամբ ապացուցել են, որ գործող համակարգի դեմ այլընտրանք չեն: Ես համոզված եմ, որ ժողովուրդն ու ես այս հարցում միակարծիք ենք, և ժողովուրդը հեգնանքով է նայում նախընտրական շրջանի զարգացումներին՝ գիտակցելով, որ գործող ռեժիմի օրոք արդար ու թափանցիկ ընտրություններ հնարավոր չեն»,- ասաց Սեֆիլյանը:
