Հարս և սկեսուր հակամարտության մեջ միակ դրական կերպարները սկեսրայրներն են, որոնք և՛ հարսների կողմից են դրական ընկալվում, և՛ նրանց մայրերի։ Նույնիսկ շատ հաճախ, երբ ծանոթները հետաքրքրվում են, թե իրենց աղջիկը ի՞նչ ընտանիք է ընկել, շտապում են ասել, որ թեև սկեսուրը մի բան չի, բայց սկեսրայրը ընտիր մարդ է։ Ինչևէ, այսօր հոգեբան Կարինե Նալչաջյանից հետաքրքրվեցինք, թե ինչու են հարսները և նրանց մայրերը դժգոհ սկեսուրներից, բայց գոհ սկեսրայրներից։ Նա մեզ հետ զրույցում տեղեկացրեց, որ սկեսրայրներն առհասարակ հետ քաշված կերպարներ են, իսկ սկեսուրների հետ հարսները ավելի շատ են առնչվում` թեկուզ կենցաղում: «Սկեսրայրը փակ ֆիգուր է և ներգրավված չէ նրանց հարաբերությունների մեջ: Նրանք մրցակցությունից դուրս են, բայց եթե հարաբերությունները սրվում են, կարող է և ներգրավվեն: Ահա սա է պատճառը, որ նրանք որպես դրական կերպար են ընկալվում, քանի որ կանայք նրանց մեջ իրենց մրցակից չեն տեսնում»,- պարզաբանեց հոգեբանը:
