Թեև ՀՀ կառավարության հյուրանոցային տնտեսության օբյեկտների որակավորման կարգերը հաստատելու մասին որոշումն արդեն 6 տարի է, ինչ ուժի մեջ է, Հայաստանում գործող 63-ից ավելի հյուրանոցներից մինչ օրս ընդամենը 22-ն են աստղ ստանալու համար հայտ ներկայացրել կառավարություն:
Համաձայն հյուրանոցային տնտեսության օբյեկտների որակավորման կարգերը հաստատելու մասին ՀՀ կառավարության 2004 թվականի որոշման, հյուրանոցային ծառայություններ մատուցող անձը որակավորման կարգի օգտագործման իրավունք ստանում է միայն համապատասխան որակավորման վկայականի առկայության դեպքում: Հյուրանոցային տնտեսության օբյեկտները կամավորության սկզբունքով կարող են ստանալ որակավորման կարգ` դիմելով էկոնոմիկայի նախարարություն: Սակայն այս դեպքում յուրաքանչյուր հյուրանոց կամ մոթել պետք է իր ծառայությունները համապատասխանեցնի որակավորման կարգի առնվազն 61 կետից բաղկացած պահանջներին, իսկ այդուհետ հյուրանոցային տնտեսության օբյեկտների նյութատեխնիկական ապահովումը և մատուցվող ծառայությունների ցանկը ևս պետք է համապատասխանեն շնորհված որակավորման կարգի պահանջներին:
ՀՀ էկոնոմիկայի նախարարության զբոսաշրջության վարչության տվյալների համաձայն` որակավորման կարգը Հայաստանում շնորհում է տարբեր ոլորտների մինչև 9 մասնագետներից կազմված հանձնաժողովը, որը մանրամասն ուսումնասիրում է տվյալ օբյեկտի յուրաքանչյուր ծառայություն` սկսած արտաքին բարեկարգման տարրերից, տեխնիկական սարքավորումներից, հանրային սննդի ծառայությունից մինչև անձնակազմի մասնագիտական որակավորում, որոնք պետք է տիրապետեն առնվազն երկու օտար լեզվի (անգլերենը` պարտադիր): Որպեսզի հյուրանոցների որակավորումը օբյեկտիվ լինի և բացառվի սուբյեկտիվ որոշման կայացումը, համապատասխան հանձնաժողովում ընդգրկվել են նաև քաղաքաշինական, սանիտարահիգիենիկ, հակահրդեհային, պաշտպանության պետական մարմինների, հասարակական կազմակերպությունների, նկարիչների, դիզայներների միությունների ներկայացուցիչները:
