Թույլ չենք տալու, որ մեր առջև կանոններ դնեն, թե ինչպիսին պետք է լինի ընդդիմությունը. այսօր լրագրողների հետ հանդիպմանը հայտարարեց «Ժառանգություն» կուսակցության անդամ, պատգամավոր Ստեփան Սաֆարյանը:
Նա վերհիշեց ՀՀ առաջին նախագահ Լևոն Տեր-Պետրոսյանի այն խոսքերը, ըստ որոնց` ընդդիմությունն այն ուժն է, ում ծեծում են, բանտ են նետում և այլն: Ստեփան Սաֆարյանն ընդգծեց, որ թույլ չեն տալու իրենց առջև չափորոշիչներ սահմանել: Ըստ նրա` այս տարիների ընթացքում հասարակությունը հասկացել է, թե ով է ընդդիմությունը:
Անդրադառնալով օրեր առաջ ընտրական հանձնաժողովների տեղերը հանրապետականներին հատկացնելու խոսակցություններին` բանախոսն ասաց, որ սկզբնական շրջանում «Ժառանգություն» կուսակցության բոլոր մասնաճյուղերին խնդրվել է տրամադրել ցուցակը excel, word ծրագրերով, սակայն ԿԸՀ ֆայլի միջոցով պետք է ներկայացվեին. դա մի փոքր ծրագրավորման ենթարկված ֆայլ է, որտեղ բջիջների որոշակի միջամտության արդյունքում կարող է պահվել մուտքագրված տեղեկատվությունը:
«Եթե դու այդ բջիջների հետ համապատասխան աշխատանք չես անում, քո մուտքագրած տեղեկատվությունը չի պահպանվում:
Մենք 9-րդ ընտրատարածքում ենք ունեցել նման խնդիր: Նախորդ օրը մուտքագրումներ էին կատարվել այդ ընտրատարածքում, իսկ հաջորդ օրը, երբ մենք փորձում էինք փոփոխություններ անել, չէր ստացվում, ուստի համապատասխան մասնագետները պետք է զբաղվեն: Մի ընտրատարածք չի կարող տրվել մի ուժի:
Ես ցավում եմ, որ որոշ քաղաքական ուժերի համար սա շահարկումների առարկա է դարձել»,- մեկնաբանեց Ստեփան Սաֆարյանը` հավելելով, որ այս պահին չգիտի, թե գործընթացն ինչ փուլում է, քանի որ դիմել են ԿԸՀ: