Նկատելի է ընտրողների շրջանում վախի մթնոլորտ սերմանելու ցանկությունը. այսօր լրագրողների հետ հանդիպմանը հայտնեց թիվ 1 ընտրատարածքում մեծամասնական ընտրակարգով «Ժառանգություն» կուսակցության կողմից առաջադրված պատգամավորության թեկնածու Ստեփան Սաֆարյանը` խոսելով նախընտրական քարոզչության մասին:
Նա նշեց, որ թիվ 1 ընտրատարածքում առաջադրվել է ընտրություններին այլընտրանք ապահովելու նպատակով: Ըստ նրա` այս շաբաթների ընթացքում ինտենիսվ քարոզչություն է իրականացվել ողջ ընտրատարածքում:
«Իմ շտաբի ակտիվիստները, կամավորները մտնում են բոլորի բնակարանները՝ մարդկանց տեղեկացնելու և իմ թեկնածության առաջադրման, և իմ ծրագրերի մասին: Ունեցել եմ մի շարք բակային հանդիպումներ:
Մայիսի 1-ին մեծ հանդիպում կկազմակերպվի Ավան-Առինջի պուրակում. դա կլինի ոչ միայն իմ հանդիպումն ավանցիների հետ, այլև «Ժառանգություն» կուսակցության առաջնորդի հանդիպումը»,- տեղեկացրեց Ս. Սաֆարյանը:
Անդրադառնալով քարոզչության ընթացքին` նա ասաց, որ այն ընթանում է առանց լուրջ միջադեպերի, որոշ թաղամասերում փորձել են խոչընդոտներ հարուցել երեխաների միջոցով, սակայն դրանք հարթվել են առանց բախումների:
«Ժառանգություն» խմբակցության պատգամավոր Ստեփան Սաֆարյանը մի փաստ բացահայտեց. SAS սուպերմարկետների ցանցի առաքիչների համար ցուցակ է կազմվել, որտեղ պետք է նշումներ կատարեն, թե որ հասցեում է այդ ընտրողը, որպեսզի ընտրության օրը նրանք բերվեն ընտրատեղամաս և ընտրեն Հանրապետական կուսակցությանը:
Հարցին, թե թիվ 1 ընտրատարածքում ում է համարում իրեն մրցակից, պատասխանեց, որ ակտիվ պայքարն իր և ՀՀԿ-ական թեկնածու Ռուբեն Հայրապետյանի միջև է: Ըստ նրա` ՀԱԿ ներկայացուցիչ Գայանե Առուստամյանին Ավանի բնակիչները չեն ճանաչում:
