Այսօր լրագրողների հետ հանդիպմանը Ժողովրդական կուսակցության նախագահ Տիգրան Կարապետյանը արտահայտեց իր դժգոհությունը ներկա քարոզարշավից. «Թիվ 17 ընտրատարածքում, որտեղ առաջադրվել եմ, գյուղապետերը կատարածուներին ուղարկում էին մարդկանց տները, որ հանկարծ դուրս չգան: Արդեն որերորդ անգամն է՝ տեսնում եմ, որ մեր դեմ աշխատանք է տարվում: Հենց ինքը՝ մարզպետն է դա անում. նա զբաղվում է ՀՀԿ պատգամավոր Կարինե Պողոսյանի քարոզչությամբ: Ես դժգոհ եմ ոչ թե ինձ համար, այլ այն պատճառով, որ ազգն է կոտրվում»:
Տ. Կարապետյանը նշեց, որ ընդհանուր առմամբ գրեթե բոլոր ուժերը խոցելի են. «ՀՀԿ-ն շեշտում է, որ ազնիվ ընտրություն է լինելու: Ինչպե՞ս դա կարող է լինել, երբ իրենք չեն ընդունում իրենց մեղքերը: Ստացվում է՝ մենք բոլորս սխալ ենք, իրենք՝ ճիշտ: Դրա համար էլ մենք ասում ենք ժողովրդին՝ դուք ընտրում եք պատգամավորին ու չեք տեսնում նրան, եթե ուզում եք տեսնել՝ ընտրեք ինձ»:
ԺԿ նախագահը խոսեց նաև այն մասին, որ ՌԴ ուժերը աջակցում են մեր կուսակցություններին: Մասնավորապես նշեց. «ԲՀԿ-ն կապեր ունի «Եդինայա Ռոսիա»-ի հետ, նույնը կարելի է ասել նաև ՀԱԿ-ի մասին: «Ժառանգությունը» ավելի արևմտամետ դիրքորոշում ունի: Իսկ ինչ վերաբերում է Դաշնակցությանը, նրանք երկու տեղով են խաղում: Մի խոսքով՝ Դաշնակցությունը ЦРУ Է, իսկ մնացածը՝ КГБ»:
Բանախոսը անդրադարձավ նաև կուսակցությունների կարգախոսներին, մասնավորապես «Ժառանգության» և ՀՀԿ-ի, և նշեց. «Ո՞վ պետք է փոխի՝ չեմ հասկանում: Իրենք պետք է փոխեն և դեռ լծակներն էլ պետք է զիջեն բնակչությանը: Իսկ ինչ վերաբերում է «Ժառանգությանը», ապա եթե երկրաշարժի նախարարություն ունեն, թող շարժեն, ի՞նչ է պատահել: Րաֆֆին խորհրդարանի մասին չի մտածում: Նա դիտվում է դրսի կողմից՝ որպես նախագահական թեկնածու»:
Անդրադառնալով ՀԱԿ-ԲՀԿ համագործակցությանը՝ Տիգրան Կարապետյանը նշեց՝ բնականաբար, դա իրենց ձեռք է տալիս: Նրանք կպայմանավորվեն. այնտեղ, որտեղ չկա ԲՀԿ-ն, ձայները կգնան ՀԱԿ-ին, և հակառակը: «Բայց ինչպե՞ս կարող է լինել համագործակցություն էշի և ձիու միջև»,- ամփոփեց Ժողովրդական կուսակցության նախագահը: