«Առաջին լրատվական»-ի զրուցակիցն է Ժողովրդական կուսակցության նախագահ, մեծամասնական ընտրակարգով թիվ 17 ընտրատարածքում առաջադրված պատգամավորության թեկնածու Տիգրան Կարապետյանը:
–Պրն Կարապետյան, քարոզարշավի ավարտին 9 օր է մնացել, ընտրությունները սարերի հետևում չեն: Ինչպե՞ս կգնահատեք քաղաքական դաշտում առկա նախընտրական իրավիճակը:
–Լավ չեմ գնահատում, որովհետև իշխանության ներկայացուցիչները՝ մարզպետները, գյուղապետերը, իրենց թիմակիցներին սատարելու համար այս ամբողջ ընթացքում օգտագործում են վարչական լծակներն ու իրենց հնարավորությունները, ինչն անթույլատրելի է:
–Այս ընթացքում արտառոց այլ ընտրախախտումներ նկատե՞լ եք:
–Եթե խոսքը ընտրակաշառքների մասին է, ապա առայժմ գումարներ չեն բաժանվում: Բայց մեկ այլ բան կարող եմ ասել: Օրինակ, ՕԵԿ-ն իր քարոզարշավների տեսահոլովակներում ցույց է տալիս նախորդ ընտրությունների կադրեր: Այդ ժամանակվա հանրահավաքներն ուղղակի ավելի մարդաշատ էին լինում:
–Դուք մեծամասնական ընտրակարգով առաջադրված եք Արտաշատի թիվ 17 ընտրատարածքում: Ինչպիսի՞ նախընտրական տրամադրություններ են Արարատի մարզում:
–Արարատի մարզպետ Էդիկ Բարսեղյանը արձակուրդ է վերցրել: Իրեն թվում է՝ դա օրինական է: Նա քարոզարշավ է անցկացնում ուրիշի համար: Նա գործող մարզպետ է, ազդեցություն ունի գյուղապետերի վրա, իրենից վախենում են: Բարսեղյանը սատարում է մեծամասնականով առաջադրված ՀՀԿ-ական թեկնածուին, իսկ ինձ ոչ ոք չի սատարում: Ինչո՞ւ պետք է պաշտոնյան սատարի մի թեկնածուի: Կենտրոնական իշխանության ներկայացուցիչը, հակառակը, իր արձակուրդը պետք է վերցնի՝ հետևելու ընտրությունների անշահախնդիր, անկողմնակալ ընթացքին:
–Պրն Կարապետյան, արդյո՞ք համամիտ եք Երևանի Մամուլի ակումբի նախագահ Բորիս Նավասարդյանի այն դիտարկման հետ, որ գրեթե բոլոր հեռուստաընկերությունները բավարար են լուսաբանում ընտրությունների ընթացքը և ընդդիմադիր թեկնածուներին հավասար եթեր են տրամադրում:
–Ինձ ընդհանրապես եթեր չի տրվել, ոչ մի անգամ այս ամբողջ ընթացքում եթերում չեմ եղել: Ոչ մի հեռուստաընկերությունից մինչ այժմ հրավեր չեմ ունեցել: