Հունվարի 29-ին ԲՀԿ-ին կմիանա նաև Հայաստանի երիտասարդական կուսակցությունը: Նման որոշման կայացման հարցում մեծ դերակատարում ունի նախընտրական շրջանը: Այս մասին մեզ հետ զրույցում նշեց Հայաստանի երիտասարդական կուսակցության նախագահ Վահան Բաբայանը:
– Անցյալ շաբաթ ինքնալուծարվեց և «Բարգավաճ Հայաստան» կուսակցությանը միացավ Հայաստանի առաջադիմական կուսակցությունը, որին, մեր աղբյուրների փոխանցմամբ, հաջորդելու է Սամվել Բաբայանի «Դաշինքը» և Ձեր` Հայաստանի երիտասարդական կուսակցությունը: Ինչո՞վ է պայմանավորված ձեր կազմալուծումը և միավորումը «Բարգավաճ Հայաստան» կուսակցությանը:
– Մենք մեր համագումարը անցկացնելու ենք հունվարի 29-ին: Համագումարի օրակարգում քննարկվելու է միայն մեր ինքնալուծարման և «Բարգավաճ Հայաստան» կուսակցությանը միանալու հարցը: Հետևաբար մենք համագումարի օրն էլ կպատասխանենք այդ հարցերին: Նշեմ նաև, որ կուսակցության վարչությունը նման որոշում կայացրել է, մնում է, որ համագումարը դա կայացնի և հաստատի: Մյուս մանրամասներին կծանոթանաք համագումարի օրը:
– Նախկինում Դուք եղել ենք «Հանրապետություն» կուսակցության անդամ և կիսել եք Վազգեն Սարգսյանի գաղափարախոսությունը, հետագայում դուրս եկաք և դարձաք Հայաստանի երիտասարդական կուսակցության նախագահ, այսօր արդեն ինքնալուծարվում եք, որ միանաք «Բարգավաճ Հայաստան» կուսակցությանը: Երիտասարդ տարիքում Դուք արդեն 3 ճակատ եք փոխել. ինչո՞վ է պայմանավորված այս վազքը կուսակցությունից կուսակցություն:
– Դա էլ կիմանաք համագումարի օրը:
– Տվյալ հարցը համագումարի հետ կապ չունի, մեզ պարզապես ձեր մեկնաբանությունն է հետաքրքիր Ձեր քայլերի վերաբերյալ:
– Մարդիկ ազատ են որոշելու իրենց քաղաքական ուղին և ճակատագիրը: Եվ մենք ենք ընտրում մեր քաղաքական թիմը:
– Ձեր միավորմամբ ի՞նչ կարող եք ավելացնել արդեն կայացած «Բարգավաճ Հայաստան» կուսակցությանը և քաղաքական դաշտում առհասարակ:
– Ես հիմա այդ հարցով չեմ ցանկանում հարցազրույց տալ, մենք այդ մասին կխոսենք համագումարի օրը: Հիմա ես դեռ խոսում եմ իմ մասին:
– Իսկ մինչ օրս Հայաստանի երիտասարդական կուսակցությունն ի՞նչ հետք է թողել Հայաստանի քաղաքական դաշտում, ի՞նչ լուծումների է հասել:
– Ես կարծում եմ, որ այդ ամենը հետագայում հասարակությունը կորոշի:
– Ինչպես երևում է, Դուք հակված չենք անկեղծանալու և առհասարակ հարցազրույց տալու:
– Դե, ես ասացի, որ Ձեր հիմնական հարցերին կպատասխանեմ համագումարի օրը, որևէ խնդիր չկա: Պարզապես մենք հիմա այս ֆորմատն ենք ընտրել և գտնում ենք, որ համագումարի օրը մյուս մանրամասներով կներկայանանք:
– Իսկ ինքնալուծարման եղանակով «Բարգավաճ Հայաստան» կուսակցությանը միանալու նախաձեռնությունը Ձե՞րն է եղել, թե՞ ԲՀԿ-ինը:
– Այդ որոշումը կայացվել է երկկողմ բանակցությունների արդյունքում:
– Իսկ վերջին շրջանում տարատեսակ կուսակցությունների միավորումները ԲՀԿ-ին առնչություն ունե՞ն նախընտրական շրջանի հետ:
– Բնականաբար: Ուժերը ընտրություններից առաջ համալրվում են:
