Հայաստանում ապրիլի 17-23-ը 1080 քաղաքացիների շրջանում անցկացված սոցիոլոգիական հարցման արդյունքում «Գելափ» միջազգային կազմակերպությունը պարզել է, որ ՀՀ նախագահի գործունեությունը դրական է գնահատում 55%-ը, չի հավանում 37%-ը, դժվարանում է պատասխանել 8%-ը:
Ինչպես այսօր լրագրողների հետ հանդիպման ժամանակ ներկայացրեց ընկերության հայաստանյան ներկայացուցչության ղեկավար Արամ Նավասարդյանը, կառավարության գործունեությանը հավանություն է տալիս հարցվողների 44%-ը, չի հավանում 47%-ը, դժվարանում է պատասխանել 9%-ը:
Ազգային ժողովի գործունեությունից գոհ է հարցվողների 34%-ը, դժգոհ` 55%-ը, դժվարացել է պատասխանել 11%-ը:
Ներկայում պետության առջև ծառացած ամենակարևոր խնդիրները քաղաքացիների 74%-ը համարում է գործազրկությունը, 42%-ը` տնտեսական վիճակը, 30%-ը` գնաճը, 23%-ը` արտագաղթը, 15%-ը` ցածր թոշակները, 13%-ը` բարձր հարկերը, 12%-ը`առողջապահական համակարգի վատ վիճակը, 11%-ը` կառավարման վատ համակարգն ու կոռուպցիան, 10%-ը` կրթական համակարգի վիճակը:
«Գելափ»-ի` ինչպիսի՞ հատկություններով պետք է օժտված լինի քաղաքական կուսակցության լիդերը հարցին քաղաքացիները պատասխանել են` հասկանա մարդկանց խնդիրները` 46%, լինի վստահելի` 35%, բոլորից լավ իմանա, թե ինչ է անհրաժեշտ երկրին` 30%, լինի պրոֆեսիոնալ և իրազեկ` 18%, ունենա ռազմավարական մտածողություն և հստակ նպատակներ` 16%, լինի հասարակ մարդ, ինչպես յուրաքանչյուր քաղաքացի` 16%, կարողանա ճիշտ և գրագետ խոսել` 8%, ազնիվ ու ճշտախոս` 5%, խարիզմատիկ` 3%, իսկ 6%-ը դժվարացել է պատասխանել:
«Գելափ»-ը նաև հետաքրքրվել է, թե քաղաքացիներն ինչ են սպասում նոր ձևավորվող խորհրդարանից: Ա. Նավասարդյանի խոսքով` հարցվողների 8%-ը կարծում է, որ երկրի վիճակը կփոխվի դեպի լավը, 33%-ը` տեղի կունենան որոշակի դրական փոփոխություններ, 42%-ը` ոչինչ չի փոխվի, 8%-ը` իրավիճակը կվատանա, 1%-ը այլ պատասխան է տվել, 9%-ը դժվարացել է պատասխանել:
Ա. Նավասարդյանը նաև տեղեկացրեց, որ «Գելափ»-ը մերժել է աշխատել «Հայաստանն առանց ընտրակեղծիքների» նախաձեռնության հետ, քանի որ այն վիրտուալ է, և պարզ չէ, թե ով կա դրա ետևում` մե՞կ հոգի, երկո՞ւ, թե՞ երեք:
