Ինչ-որ մեկը ընտրացուցակները կեղծելու հանձնարարական է ստացել. այսօր ՀՔՄ գրասենյակում միասնական շտաբի չորրորդ նիստի ժամանակ նման տեսակետ հայտնեց միասնական շտաբի անդամ, ԲՀԿ ներկայացուցիչ Վարդան Օսկանյանը` ներկայացնելով շտաբի առաջիկա ամենակարևոր անելիքը:
Նա նշեց, որ այսօր ՍԴ-ից կպահանջեն հնարավորինս սեղմ ժամկետում տրամադրել ընտրացուցակները: Վարդան Օսկանյանը հույս հայտնեց, որ դատարանը ողջամիտ կգտնվի, քանի որ, ըստ նրա, այլ ելք չունեն ընտրողների ցուցակներին տիրապետելու:
«Իմ ձեռքի տակ ցուցակների խախտումների մի քանի հարյուր նմուշ է, բայց նման խախտումները հազարավոր են: Մի տառի փոփոխմամբ նույն անունը մի քանի անգամ կա ընտրողների ցուցակներում: Սա միտում է. ինչ-որ մեկը ինչ-որ մեկից սա իրականացնելու հանձնարարական է ստացել»,- նկատեց Վ. Օսկանյանը:
Միասնական շտաբի նիստին ներկա էր նաև ՀԱԿ ներկայացուցիչ Լևոն Զուրաբյանը, որը ևս այս հարցի վերաբերյալ կիսեց իր մտահոգությունները: Նա տեղեկացրեց, որ ՀԱԿ-ը նույնպես ուսումնասիրում է ցուցակները և դրա համար կիրառում տարբեր տեսակի ծրագրեր:
«Մասնավորապես աննորմալ քանակ են կազմում հասցեները, որոնցում տասից ավելի մարդ է գրանցված. դա ֆանտաստիկայի ոլորտից է: Որոշ ընտրատարածքներում մենք ունենք հետևյալ պատկերը՝ չորս տոկոս բնակարաններում քսան տոկոս ընտրողներ են տեղակայված. սա վիճակագրական անոմալիա է: Հայտնաբերել ենք շենքեր, որոնք գոյություն չունեն, կամ այդ շենքերը կան, սակայն նրանցում մարդ չի ապրում:
Թիվ 6 ընտրատարածքում մեր կողմից առաջադրված թեկնածու Ավետ Պողոսյանի նախընտրական շտաբը հայտնաբերել է տասը գոյություն չունեցող շենք, դիմել է ընտրական հանձնաժողովին, որպեսզի նրանք ապահովեն այդ ընտրողների հետ քարոզչությունը, քանի որ նա իր սեփական ուժերով նրանց չի կարողանում հայտնաբերել: Ընտրացուցակները հիմնովին կեղծված են, որը նշանակում է՝ պատրաստվում են լայնամասշտաբ կեղծարարությունների»,- հարցի վերաբերյալ ՀԱԿ տեսակետը հայտնեց Լևոն Զուրաբյանը: