ԿԸՀ-ից «Առաջին լրատվական»-ին տրամադրված Գագիկ Ծառուկյանի գույքի և եկամուտների հայտարարագիրն աչքի է ընկնում իր «հաստափորությամբ»՝ եթե պատգամավորության այլ թեկնածուների հայտարարագրերը հիմնականում 3-4 էջ են, ապա Ծառուկյանի ունեցվածքը տեղավորվել է 7 էջում:
Եվ այսպես, ինչ է հայտարարագրել ԲՀԿ առաջնորդը. 3 շենք՝ Առինջում՝ ընդհանուր մոտ 6,665 քմ մակերեսով, 3 շենքեր՝ Սևան (875 քմ և 329 քմ) և Դիլիջան (1034 քմ) քաղաքներում, բազմաթիվ հողամասեր՝ Առինջում, Վերին Պտղնիում, Ծաղկաձորում, Դիլիջանում և Սևանում (ընդհանուր 33 հա), 7 ավտոմեքենա՝ 2 «Ռոլս-Ռոյս», BMW X-5, «Տոյոտա Պրադո», «Ջիպ Վրանգլեր», «Նիսան Պատրուլ» և «Ռենջ Ռովեր» մակնիշների:
Ուշագրավ է Գ. Ծառուկյանի՝ 8 մլն դրամը գերազանցող թանկարժեք գույքը. ադամանդե քարով 3 հատ ոսկե մատանի՝ 700 հզ., 1 մլն և 3 մլն դոլար արժողությամբ, ձեռքի ադամանդակուռ ժամացույց` 300 հզ. դոլար, ոսկե շղթայով ադամանդակուռ 2 հատ ժամացույց` 500 հզ-ական դոլար, իսկ կահույքի արժեքը գերազանցում է 811 հզ. եվրոն:
Այս տարվա մարտի 1-ի դրությամբ Գ. Ծառուկյանի բանկային հաշվեհամարներում եղել է 1 մլրդ 161 մլն դրամ, 30 մլն 730 հզ. դոլար և 20 մլն 483 հզ. եվրո:
Գ. Ծառուկյանի եկամուտներն անցած 1 տարում կազմել են 6 մլրդ դրամ, 60 մլն 81 հզ. դոլար և 40 մլն եվրո, այդ թվում՝ «Արարատցեմենտ», «Զվարթնոց Հենդլինգ», «Մագաս ինվեստ», «Գլոբալ Մոթորս», «Ֆարմ-Ադամա», Chimera Business Corporation, «Կոնվերս բանկ», «HSBC բանկ Հայաստան» ընկերություններից:
Գ. Ծառուկյանը բաժնետոմսեր ունի 32 ընկերություններում, այդ թվում՝ «Մուլտի Գրուպ» կոնցեռնի, «Մուլտի Գրուպ-Սթոուն», «Մուլտի Ռեստ Հաուս», «Մուլտի Մոթորս», «Բելլեզզա», «Միրա Ջի», «Կոտայք» գարեջրի գործարանի, «Հոթել Ռիգա» ընկերությունների 100 % բաժնետերն է:
