Հեռուստաընկերությունների գործելակերպում էական առաջընթաց կա: Այսօր «Առաջին լրատվական»-ի հետ զրույցում նման տեսակետ հայտնեց ԱԺ «Ժառանգություն» խմբակցության պատգամավոր, թիվ 6 ընտրատարածքում առաջադրված պատգամավորության թեկնածու Արմեն Մարտիրոսյանը` խոսելով ազատ և արդար ընտրությունների անցկացման հնարավոր հեռանկարի մասին: Նա ակնհայտ առաջընթաց համարեց հեռուստաընկերությունների պահվածքը: «Կարող է դա պայմանավորված է մոնիտորինգով, կամ քաղաքական կամք կա հեռուստաընկերությունները ազատ թողնելու, չգիտեմ, բայց ակնհայտ է առաջընթացն»,- ասաց պատգամավորը:
Անդրադառնալով այլ ոլորտներին` նա ասաց, որ ազատ ընտրությունների մասին ինչ–որ չափով միայն կարելի է խոսել, բայց արդար ընտրությունների մասին չի կարելի խոսել, որովհետև վարչական ռեսուրս է օգտագործվում, հանրային տարածքներ են օգտագործվում անօրինականորեն, ընտրակաշառքներ են բաժանվում կամ ընտրակաշառքի խոստումներ են տրվում, անձնագրեր են հավաքագրվում, ճնշումներ գոյություն ունեն աշխատատեղեր կորցնելու վերաբերյալ: Ըստ նրա` բնականաբար, այս դեպքերում արդար չի կարելի համարել ընտրությունները` հաշվի առնելով նաև «ցեխարձակումները», որոնք տեղի են ունենում «Ժառանգության» հասցեին:
«Հույս ունեմ, որ այս անգամ քվեարկությունն իսկապես նորմալ կլինի և Հրազդանի ընտրությունների նման գոնե կլինի, տեղամասերում տեղի չեն ունենա բռնություններ, լցոնումներ, ծեծուջարդ: Հիմա ամբողջ խնդիրը կայանում է սրանում»,- իր խոսքը եզրափակեց Արմեն Մարտիրոսյանը: