ՀՀ ԱԺ պատգամավոր Սամվել Ալեքսանյանը, ով մայիսի 6-ին կրկին հավակնում է դառնալ պատգամավոր (մեծամասնական՝ 7 ընտրատարածք և ՀՀԿ ցուցակում 159-րդ տեղ), և ով հատուկ բանկային հաշիվ է բացել նախընտրական քարոզարշավն իրականացնելու համար, բանկային այլ հաշիվներին մարտի 1-ի դրությամբ ունեցել է 380 մլն դրամ և 9 մլն 385 հզ. դոլար: Այս մասին տեղեկանում ենք ԿԸՀ-ից «Առաջին լրատվական»-ին տրամադրված գույքի և եկամուտների հայտարարագրից:
Ըստ այդմ՝ Ս. Ալեքսանյանի եկամուտներն անցած տարվա ընթացքում ձևավորվել են աշխատավարձից՝ 3 մլն 25.8 հզ. դրամ, «Կարմիր առագաստներ» «Ս.Վ.Ս» ՍՊԸ-ներից ստացած 11 մլն 250 հզ. դրամ և 3 մլն 300 հզ. շահաբաժնից, և ընդամենը 840 հզ. դրամ վարձավճարից, որ ստացել է «Ալեքս Գրիգ» ՍՊԸ-ից: Հետաքրքրական է, որ այս ամենի հետ մեկտեղ Ս. Ալեքսանյանը չունի ոչ մի բիզնես և ոչ մի բաժնետոմս:
Ունեցած անշարժ գույքից Ս. Ալեքսանյանը հայտարարագրել է 1030 քմ մակերեսով տուն՝ Շահումյան փողոցում, դրան կից 0.13 հա հողամաս, 11 հզ. 451 քմ մակերեսով շինություն և հարակից 2.1 հա հողամաս՝ Շրջանային փողոցում, 164 քմ մակերեսով շինություն՝ Կասյան փողոցում, 49 քմ մակերեսով շինություն և հարակից 0.1 հա հողամաս՝ Ծաղկաձորում, մոտ 37 հա և 1 հա մակերեսով հողամասեր ունի նաև Շիրակի մարզի Արևիկ համայնքում և Երևանի Սեբաստիա փողոցում:
Ս. Ալեքսանյանն ունի նաև 4 ավտոմեքենա` 2005 թ. և 2009 թ. արտադրության 2 «Մերսեդես Բենց», 2006 թ. արտադրության «Ռենջ-Ռովեր» և կրկին 2006 թ. արտադրության «Վազ 21124» մակնիշի: