Ինչպես արդեն հաղորդել ենք, Վրաստանում H1N1 գրիպի 60-ից ավելի դեպք է արձանագրվել, գրանցվել է մահվան 7 դեպք։ Սննդի անվտանգության և անասնաբուծության վարչության պետի տեղակալ Գևորգ Թովմասյանից փորձեցինք ճշտել` արդյո՞ք խոզի գրիպը Հայաստան հասել է, վտանգը մեծացել է, թե ոչ։ Նաև, թե ի՞նչ կանխարգելիչ միջոցառումներ են իրականացվում։ Նա մեզ հետ զրույցում նշեց, որ իրենք դեռ լուր չեն ստացել։ «Հանրապետության մակարդակով մեզ մոտ դեռևս արձանագրված դեպք չկա։ Նույնիսկ պաշտոնապես դեռևս հարևան հանրապետությունից էլ նման տեղեկատվություն չկա։ Ինչ խոսք, եթե այնտեղ գրիպը լայն տարածում է ստանում, ապա գրիպի Հայաստան ներխուժումը ևս ավելանում է։ Կանխարգելիչ միջոցառումները այն նույն միջոցառումներն են , ինչ իրականացնում էինք աֆրիկական ժանտախտի ժամանակ. ուժեղացնում ենք հսկողությունը սահմանային հսկիչ կետերում, ինչպես նաև թույլ չի տրվում կենդանական ծագման ոչ մի կիլոգրամ միս կամ կենդանի առանց ստուգման դուրս բերվի»,- մանրամասնեց Գևորգ Թովմասյանը։