Կառավարության հինգշաբթի օրվա նիստում քննարկվելու է 2011 թվականի պետական բյուջեով նախատեսված ՀՀ կառավարության պահուստային ֆոնդի միջոցներից 2011 թվականի 1-ին եռամսյակում ՀՀ տրանսպորտի և կապի նախարարությանը 8 մլն դրամ հատկացնելու որոշման նախագիծը: Գումարը տրամադրվելու է Վանաձոր-Դիլիջան ավտոճանապարհի 39-րդ կմ-ում սողանքային հատվածի հիմնանորոգման համար երկրաբանա-հետազոտական աշխատանքներ կատարելու նպատակով: «Վանաձոր-Դիլիջան ավտոճանապարհի 39-րդ կմ-ում առկա սողանքային երևույթների հետևանքով տարիներ շարունակ կատարված փոքր ծավալի հիմնանորոգման աշխատանքներն էապես չեն լուծում նշված հատվածի անվտանգության հարցը: Մասնագիտացված կազմակերպության եզրակացությամբ, նշված սողանքային հատվածի հիմնանորոգման համար նախագծային լուծումներ հնարավոր է առաջարկել միայն մանրամասն երկրաբանական ուսումնասիրություններ կատարելուց հետո: Երկրաբանական աշխատանքները կտևեն շուրջ մեկ ամիս և հորատման աշխատանքներն իրականացնելու համար անհրաժեշտ կլինի մոտ 8,000.0 հազար դրամ»,- նշված է նախագծի հիմնավորման մեջ: