Այսօր կառավարության առաջ բողոքի ակցիա էին կազմակերպել տոնավաճառների այն առևտրականները, ովքեր օգտվում են Հարավկոկասյան երկաթուղու ծառայություններից: «Առաջին լրատվական»-ի հետ զրույցում առևտրականներից մեկը նշեց, որ մաքսային ծառայություններից իրենք չեն կարող ներմուծած ապրանքը վերցնել, քանի որ կրկնակի շատ վճար են իրենցից պահանջում: Այսինքն` բեռնափոխադրումների ծախսը և մաքսավճարները առևտրականները վճարում են սահմանի վրա` ապրանքը վերցնելիս, և հիմա հանկարծակիի են եկել այդ կրկնակի թանկացումից, որը, իրենց ասելով, իրականացրել է «Հարավկովկասյան երկաթուղիներ» ընկերությունը` ՀՀ կառավարության «համաձայնությամբ կամ հանձնարարությամբ»: «Մենք ուզում ենք իմանալ` ինչն ինչոց է, մեր հարցին պատասխան տան, որ իմանանք մեր գլխին գալիքը: Մի տուն ունենք, դա էլ ծախենք՝ տոկոսները տանք ու պրծնենք: Ո՞նց կարելի է, առանց մարդկանց որևէ բան ասելու, գին բարձրացնել: Մարդիկ գնում են, առևտուրն անում գալիս, ու սահմանի վրա պարզվում է, որ կրկնակի պետք է մուծեն»,- «Առաջին լրատվական»-ի հետ զրույցում ասաց կառավարության շենքի առջև բողոքող կանացից մեկը, որ չցանկացավ ներկայանալ: Ըստ նրա՝ այս պահին իրենք սահմանին ապրանք ունեն, որը մաքսային մարմինները թույլ չեն տալիս մտցնել Հայաստան: Լրագրողների հետ հանդիպման ժամանակ «Հարավկովկասյան երկաթուղիների» սակագների հետ կապված պարզաբանում տվեց նաև ՀՀ տրանսպորտի և կապի նախարար Մանուկ Վարդանյանը: «Ըստ կոնցենսիոն պայմանագրի՝ սակագնի սահմանումը իրենց իրավասության խնդիրն է, բայց մեր աշխատանքային պայմանավորվածության հիման վրա` մեր խնդրանքով, իրենք պետք է մեզ հետ համաձայնեցնեն գինը: Երկու գործոնից է կախված սակագնի ձևավորումը: Առաջինը սակագինն է, երկրորդը՝ կայարանային ծախսերն են: Ասեմ, որ այդ խնդիրը մեզ մոտ բարձրացվել է, երկաթուղու հետ քննարկել ենք և նաև հաշվարկներ ենք արել փոխադրողների հետ: Եթե սակագները ձևավորվեն դոլար-շվեյցարական ֆրանկ և դոլար-դրամ հարաբերությամբ, ապա ասեմ, որ դա իջած է այս պահին: Որոշակի թանկացումներ կան կայարանային ծախսերի առումով, և մենք հաշվարկել ենք՝ մեծ հաշվով 3 մլն 400 հազար դրամ նրանք ոնց որ թե շահել են: Որոշակի փոփոխություններ կան կարճ հեռավորության հետ կապված, եթե կարճ հեռավորության վրա է բեռը փոխադրվում, դա մի քիչ ավելի թանկ է, քան՝ երկար հեռավորության վրա. սա ընդունված նորմ է: Մեծ առումով, կարծում եմ, սակագնային փոփոխություն չկա»,- ասաց նախարարը: