BP նավթային ընկերության նախկին ինժեներին ապրիլի 24-ին ձերբակալել են՝ 2010 թ. նավթի արտահոսքի տվյալները թաքցնելու կասկածանքով: Այս մասին հաղորդել է NPR գործակալությունը` մեջբերելով ԱՄՆ արդարադատության նախարարության ներկայացուցչին: Խոսքը Մեքսիկական ծոցում BP կառամատույցում պայթյունի մասին է, որը հանգեցրել էր նավթային արտահոսքի:
Ենթադրվում է, որ ընկերության ինժեներ 50–ամյա Կուրտ Միքսը iPhone-ի հիշողությունից ջնջել է ղեկավարի հետ նամակագրությունը, որում խոսվել է նավթային արտահոսքի մասին: Հաղորդագրության մեջ, մասնավորապես, տեղեկատվություն է եղել այն մասին, թե ինչ քանակությամբ նավթ է հոսել Մեքսիկական ծոց:
Նախարարության հաղորդագրության մեջ նշվել է, որ Միքսը ջնջել է հարյուրավոր հաղորդագրություններ, չնայած վթարից հետո նրան զգուշացրել էին, որ դրանք պետք է պահել: Հաղորդագրությունների մի մասը հաջողվել է վերականգնել:
Միքսին ներկայացվել է արդարադատությանը խոչընդոտելու մեղադրանք: Գործակալության տեղեկատվության համաձայն` սա առաջին մեղադրանքն է, որն ուղղված է ֆիզիկական անձի դեմ` կապված Մեքսիկական ծոցում նավթի արտահոսքի հետ: Եթե Միքիսը մեղավոր ճանաչվի, նրան սպասվում է մինչ 20 տարվա ազատազրկում և 250 հազար դոլար տուգանք:
2010 թ. Մեքսիկական ծոցում նավթի արտահոսքը սկսվել էր կառամատույցի վթարից հետո, որի հետևանքով զոհվել էր 11 մարդ: Մեքսիկական ծոց էր արտանետվել 4.9 միլիոն բարել նավթ:
