ԱՄՆ-ի նախագահը կրկին խուսափել է «ցեղասպանություն» բառից` հերթական անգամ ամերիկահայությանը հասցեագրած ապրիլքսանչորսյան ուղերձում գործածելով հայերեն «Մեծ Եղեռն» արտահատությունը:
«Այսօր մենք հիշում ենք Մեծ Եղեռնը` 20-րդ դարի ծանրագույն ոճրագործություններից մեկը: Մեր այս քայլով մենք մեր հարգանքի տուրք ենք մատուցում այն մեկուկես միլիոն հայերին, որ դաժանաբար կոտորվեցին կամ բռնեցին մահվան ուղին Օսմանյան կայսրության անկման շրջանում», – հայտարարում է Օբաման` նշելով նաեւ, որ 1915 թվականի իրադարձություններից 97 տարի անց էլ ողջ աշխարհում եւ Միացյալ Նահանգներում լայնորեն նշվում է այս տխուր տարելիցը:
«Մեր պարտավորությունն է` գործով ու խոսքով վառ պահել նահատակների հիշատակի կրակը, ինչպես նաեւ թույլ չտալ, որպեսզի պատմության այս մութ էջերը երբեւիցէ կրկնվեն», – հայտարարում է Օբաման` հատուկ ընդգծելով. – «Ես բազմիցս վերահաստատել եմ 1915 թվականի իրադարձությունների վերաբերյալ իմ անձնական տեսակետը: Իմ մոտեցումները մնում են անփոփոխ»:
Օբաման, ինչպես եւ նախորդ տարիներին, այս անգամ էլ խոսել է հայերի եւ թուրքերի միջեւ հարաբերությունների բարելավման, ինչպես նաեւ պատմությանն առերեսելու անհրաժեշտության մասին:
«Փաստերի լիակատար, ազնիվ ու արդար ճանաչումը բխում է մեր բոլորի շահերից: Հնարավոր չէ առաջ շարժվել առանց անցյալի հետ հստակ առերեսման: Միացյալ Նահանգներն իրենց սեփական պատմության պարագայում բազմիցս դիմել են այդ քայլին, եւ ես համոզված եմ, որ դրանից հետո մենք շատ ավելի ուժեղ ենք դարձել», – նշում է Օբաման` մատնանշելով այն անհատ հայերի ու թուրքերի ջանքերը, ովքեր հաշտությանն ուղղված քայլեր են ձեռնարկում:
«Թեեւ կորսված մարդկային կյանքերը այլեւս երբեք ետ չես բերի, այնուհանդերձ հայ ժողովրդի ժառանգությունը հաղթանակել է: Ձեր հավատը, համարձակությունն ու ուժը ձեզ հնարավորություն տվեցին վերապրել ու բարգավաճել` աշխարհով մեկ կենսունակ համայքներ ստեղծելով», – նշում է Միացյալ Նահագների նախագահը` շարունակելով հայերի հասցեին հաճոյախոսությունների շարքը. – «Դուք համարձակորեն կարողացաք պահպանել ձեր ժառանգությունը` փոխանցելով այն սերնդեսերունդ: Ամերիկահայությունը տարբեր ոլորտներում ներդրումներ է ունեցել` նպաստելով թե’ ԱՄՆ-ի զարգացմանը, թե’ Հայաստանի ժողովրդավարական, խաղաղ ու բարգավաճ զարգացմանը»:
Եզրափակելով իր ուղերձը` Սպիտակ տան ղեկավարը նշում է. – «Հիշատակի այս տխուր օրը մենք հայերի կողքին ենք` վերհիշելով Մեծ եղեռնի մութ օրերն ու պարտավորվելով ավելի պայծառ ապագա ապահովել Հայաստանի ժողովրդի համար»:
