Թուրքիայի վարչապետ Ռեջեփ Թայիփ Էրդողանը երկօրյա այցով Ուկրաինայում է: Երեկ նա հանդիպել է Ղրիմի թաթարների առաջնորդ, Ղրիմի թաթարների խորհրդարանի նախագահ Մուստաֆա Քիրիմօղլուին:
Սա կրկին նոր վերլուծությունների տեղիք է տվել, քանի որ վերջին շրջանում թուրքերը մեծ ուշադրություն են դարձնում թաթարների հետ հարաբերություններին, ինչը, բնականաբար, դուր չի գալիս ուկրաինական իշխանություններին:
Էրդողանը Կիևում հանդիպել է երկրի նախագահ Վիկտոր Յանուկովիչին և իր ուկրաինացի պաշտոնակից Միկոլա Ազարովին: Այս պահին հանդիպումը շարունակվում է: Սպասվում է, որ կողմերը կստորագրեն Բարձր մակարդակի ռազմավարական խորհուրդ ստեղծելու մասին հռչակագիր:
Մինչև Կիև մեկնելը, Էրդողանը լրատվամիջոցների ներկայացուցիչներին հայտնել է, որ փոխգործակցության մակարդակը երկու երկրների միջև ամեն օր աճում է:
Բացի խորհրդի ստեղծման հռչակագրից, կստորագրվեն նաև մի շարք համաձայնագրեր, որոնք վերաբերում են տնտեսական ոլորտին: Ինչպես նաև կանցկացվի Թուրքիա-Ուկրաինա բիզնես խորհրդի նիստը, որտեղ ներկա կգտնվեն երկրների ղեկավարները: