Սենֆորդի ոստիկանության ղեկավար Բիլլ Լին չի հեռացվել աշխատանքից սևամորթ դեռահաս Թրեյվոն Մարտինի սպանությունից հետո: Այս մասին հաղորդում է CNN-ը: Նման որոշում կայացվել է քաղաքային կոմիտեի կողմից ապրիլի 23-ին: Իր հասցեին քննադատություինից հետո ոստիկանը հայտարարել էր, որ ժամանակավորապես լքելու է իր պաշտոնը, որպեսզի չխանգարի հետաքննությանը:
Բիլլ Լիին քննադատել են նրա համար, որ չի ձերբակալել դեռահասին սպանած Ջորջ Ցիմերմանին: Ոստիկանի ճակատագրի վերաբերյալ հիմնական որոշումը կկայացվի գործի վերջնական հետաքննությունից հետո:
Հասարակության մեջ վրդովմունքի ալիքի հետևանքով քրեական գործ Ջորջ Ցիմերմանի նկատմամբ, այնուամենայնիվ, հարուցվել է, որից հետո նրան ձերբակալել են: Սակայն ապրիլի 20-ին Ֆլորիդայի դատարանը համաձայնել էր նրան 150 հազ. դոլար գրավի դիմաց ազատ արձակել: Վճարելով այդ գումարի 10%-ը՝ Ցիմերմանը ազատ է արձակվել:
Մեղադրյալի անունից լրատվամիջոցների հետ շփվում է նրա փաստաբանը: Նա պատմել է, որ Ցիմերմանը հերքում է իր մեղքը և միևնույն ժամանակ վախենում է իր անվտանգության համար՝ պատասխանատվությունը դնելով լրատվամիջոցների վրա, որոնք էլ աղմուկ բարձրացրին այս ամենի շուրջը: Իր գտնվելու վայրը նա չի բացահայտում: Միևնույն ժամանակ, իշխանությունները կարող են հետևել նրան հատուկ սարքավորման շնորհիվ, որը նա պարտավոր է կրել հետաքննության ամբողջ ընթացքում:
