ԱՄՆ-ից հեռացող մեքսիկացիների թիվը հավասարվել է ԱՄՆ գաղթող մեքսիկացի ներգաղթյալների թվին: Այդ մասին նշված է Pew Hispanic Center-ում հրապարակված հետազոտության մեջ:
2005-2010թթ. Մեքսիկայից ԱՄՆ է գաղթել շուրջ 1.4 միլիոն մարդ (ամենայն հավանականությամբ, այստեղ հաշվել են նաև անօրինական ներգաղթյալներին): Ընդ որում` այս ժամանակահատվածում ԱՄՆ-ում բնակվող նույն քանակությամբ մարդիկ լքել են Միացյալ Նահանգները: Ինչպես նշված է հետազոտության մեջ, ԱՄՆ-ից հեռացածների թիվը կարող է ավելի մեծ լինել, քան Մեքսիկայից ԱՄՆ տեղափոխվածներինը:
Համեմատության համար նշենք, որ 1995-2000թթ. ԱՄՆ է գաղթել շուրջ 3 մլն մարդ Մեքսիկայից, իսկ այդ ժամանակահատվածում երկիրը լքել են 700 հազարից ոչ պակաս մեքսիկացի ու ԱՄՆ-ում ծնված նրանց երեխաները:
Հետազոտողները ստեղծված իրավիճակը բացատրում են առաջին հերթին ԱՄՆ-ում առկա գործազրկության բարձր մակարդակով, սահմանային հսկողության մեծացմամբ, անօրինական ներգաղթյալների վտարմամբ, Մեքսիկայում ծնելիության նվազմամբ ու երկրի տնտեսական վիճակով:
2011թ. տվյալով` համաձայն Pew Hispanic Center-ի, ԱՄՆ-ում բնակվում է 5.8 մլն օրինական ու 6.1 մլն անօրինական ներգաղթյալ մեքսիկացի :
Մեքսիկացիները կազմում են ԱՄՆ-ում բնակվող անօրինական ներգաղթյալների 58 տոկոսը: