ԱՄՆ-ում ապրիլի 23-ին դատական գործընթաց է սկսվել Հյուսիսային Կարոլինայի նախկին դեմոկրատ սենատոր, 2004 և 2008 թթ. նախագահական քարոզարշավների մասնակից Ջոն Էդվարդսի դեմ: Այս մասին հաղորդում է Agence France-Presse-ը:
Էդվարդսը մեղադրվում է նախընտրական քարոզարշավի ֆինանսավորման մասին օրենքը խախտելու մեջ:
Ինչպես կարծում է հետաքննությունը, 2008 թ. նախկին սենատորը անօրինական ճանապարհով ստացել է շուրջ 1 միլիոն դոլար բարեգործություն իր նախընտրական հիմնադրամի համար, որն այնուհետ ծախսել է իր սիրուհու և ապօրինի երեխայի գոյության փաստը հասարակությունից թաքցնելու վրա:
Ընդհանուր առմամբ` Էդվարդսին մեղադրանք է առաջադրվել 6 կետով, այդ թվում` սուտ վկայություն տալու, անօրինական նվիրատվություն ստանալու ու հանցավոր համաձայնության գալու: Եթե նրա մեղքն ամբողջությամբ հաստատվի, ապա քաղաքական գործչին կսպառնա մինչև 30 տարվա ազատազրկում ու 1.5 միլիոն դոլար տուգանք:
Ինչպես ենթադրվում է, նախկին սենատորի դեմ դատական գործընթացը կտևի 2-6 շաբաթ: Մեղադրող կողմի գլխավոր վկա է հանդես գալու Էդվարդսի նախկին օգնական Էնդրյու Յանգը:
Անձամբ Էդվարդսը, որը ավելի վաղ դավաճանության փաստն անվանել էր «սխալ, որի համար զղջալու է ամբողջ կյանքում», իրեն մեղավոր չի ճանաչում օրենսդրությունը խախտելու մեջ: Ինչպես նշում է Associated Press գործակալությունը, ստացված միջոցները եղել են նրա «ընկերների նվերները», իսկ նախկին սենատորը սիրուհու և երեխայի գոյության փաստը ցանկացել է թաքցնել միայն իր կնոջից ու երեխաներից:
Էդվարդսի` կնոջը դավաճանելու մասին լուրը հաստատվելուց հետո նրա կինը` Էլիզաբեթը, բաժանվեց ամուսնուց: 2010 թ. Էլիզաբեթ Էդվարդսը մահացավ քաղցկեղից: