ՀՀ աշխատանքի և սոցիալական հարցերի նախարարության հաշմանդամների և տարեցների վարչությունը 2000 թվից զբաղվում է Երևան քաղաքի անօթևանների հարցերով՝ տրամադրելով նրանց ժամանակավոր կացարան: 2006 թ. հունվարին թիվ 1 տուն-ինտերնատին առընթեր բացվեց անօթևան մարդկանց ժամանակավոր կացարան, սկզբում՝ 30 տեղանոց, հետո էլ անհրաժեշտությունից ելնելով` 50, այնուհետև` 60 տեղանոց: «Ճիշտ է, 2009 թվից անօթևանների կացարանը միաժամանակ կարողանում է սպասարկել 60 անօթևանի, սակայն այդ 60 տեղն էլ չի բավականացնում, հատկապես՝ ձմռան ամիսներին, երբ դիմողների թիվն ավելանում է: Ամռան ամիսներին պատկերն այլ է, քանի որ դրսում տաք է, և հնարավորություն կա այգիներում և կայարաններում գիշերելու»,- նշում է աշխատանքի և սոցիալական հարցերի նախարարության հաշմանդամների և տարեցների հիմնահարցերի վարչության պետի տեղակալ Անահիտ Գևորգյանը:
Այս տարի պետական բյուջեն անօթևանների կացարանին է տրամադրել 69 մլն դրամ՝ նախորդ տարվա 54 մլն-ի փոխարեն. «Դա պայմանավորված է փափուկ գույքի ձեռքբերմամբ, սննդամթերքի թանկացմամբ: Անօթևաններին օրական տրամադրվում է 2500 դրամ, որից 1220-ը` սննդի համար: Կարիք կա նոր կացարան ստեղծելու։ Ծրագրով հաջորդ կացարանը կստեղծվի Գյումրիում»,- ավելացրեց տիկին Գևորգյանը:
