ՀՀԿ մամուլի եւ հասարակայնության հետ կապերի վարչությունը տեղեկացնում է, որ ՀՀԿ նախագահ Սերժ Սարգսյանն այսօր նախընտրական հանդիպումներ է ունեցել մայրաքաղաքի Նոր Նորք և Նորք-Մարաշ վարչական շրջանների ընտրողների հետ:
Նոր Նորքի բնակիչների հետ հանդիպմանը ՀՀԿ նախագահը նշել է, որ մայրաքաղաքի ամենամեծ այս համայնքը միաժամանակ ամենամիասնական համայնքներից մեկն է, և դա շատ հաճախ կարևոր դեր է ունեցել համայնքային խնդիրների լուծման հարցում:
Սերժ Սարգսյանն ընդգծել է, որ Հանրապետական կուսակցությունն էլ հասարակական համերաշխության ջատագովներից է: «Մեր բազմաթիվ քայլեր միասնականության խորհուրդն են ունեցել, մեզ հաջողվել է էապես մեղմել քաղաքական պառակտվածության ու անհանդուրժողականության դրսևորումները մեր երկրում: Գալիք ընտրություններն էլ մենք պատկերացնում ենք այդպիսին, այդ ընտրություններին էլ մենք ներկայացել ենք ծրագրով, որը խարսխված է համերաշխության և ուժերի մեկտեղման կարևորության վրա:
Մենք ասում ենք ժամանա՛կն է, այո՛, վաղուց արդեն ժամանակն է անշրջելիորեն փոխել մեր քաղաքական կյանքի մթնոլորտը»,-ասել է Սերժ Սարգսյանը:
Կառավարող քաղաքական ուժի ղեկավարի խոսքով, Հանրապետական կուսակցությունը և ինքն անձամբ արել են ամեն ինչ, որպեսզի Հայաստանում հաստատվի նոր՝ իսկապես դրական մթնոլորտ, որպեսզի մեր երկրում հաստատվի համաձայնության քաղաքական մշակույթ և քաղաքական կյանքում ներգրավված լինեն մեր հանրության բոլոր ու ամենատարբեր խավերի և շերտերի ներկայացուցիչները: Սերժ Սարգսյանի վստահեցմամբ, ՀՀԿ-ն շարունակելու է հավատարիմ լինել այդ քաղաքականությանը և համագործակցության կամուրջներ կառուցել, համաձայնության եզրեր փնտրել ու գտնել՝ ներգրավելով բոլոր շահագրգիռ կողմերին:
«Մենք խոսում ենք փոփոխությունների մասին, մենք ասում ենք, որ հավատում ենք դրանց անհրաժեշտությանը: Այո՛, ժամանակն է անհրաժեշտ փոփոխությունները կյանքի կոչելու: Եվ մեր խոսքը հիմնավոր դարձնելու, այն ամրապնդելու համար մենք սկսել ենք ինքներս մեզնից:
Թո՛ղ թերահավատները նայե՛ն Հանրապետականին և տեսնե՛ն, որ մենք ենք այն առաջատար քաղաքական ուժը, որը ներգրավել է մտավորականների, երիտասարդների, կանանց: Թո՛ղ թերահավատները նայե՛ն Հանրապետականին և տեսնե՛ն, որ մենք բաց ենք եղել նաև անկուսակցականների և այլ կուսակցությունների ներկայացուցիչների հետ համագործակցելիս»,-ասել է ՀՀԿ նախագահը:
Սերժ Սարգսյանն ընդգծել է, որ Հանրապետականը վճռական է տրամադրված մեր երկրում եղած թերությունների դեմ պայքարելու հարցում:
ՀՀԿ նախագահի խոսքով, Հանրապետականի ուժը իր վարած լայն ժողովրդականության մեջ է: Ի հավաստումն ասվածի, նա նշել է, որ Հայաստանում չկա գեթ մեկ բնակավայր ու համայնք, գեթ մեկ բնագավառ ու խնդիր, որի հանդեպ Հանրապետականը ուշադրություն ցուցաբերած չլինի, որը Հանրապետականը ուսումնասիրած չլինի և որի համար Հանրապետականները լուծում փնտրած չլինեն: «Այո՛, Հանրապետականը շատ բան է արել ու կարող է հպարտանալ իր արածով: Բայց մենք շատ լավ գիտակցում ենք մեր թերությունները և պատրաստ ենք դրանք հաղթահարելու՝ միավորելով բոլորիս ջանքերը: Հաղթահարելու ենք, որպեսզի իրականություն դարձնենք մեր երազանքների Հայաստանը՝ մեր արժանապատվության ու հպարտության երկիրը:
Դա է լինելու մեր իրականությունը: Այն իրականությունը, որ ստեղծելու ենք բոլորս միասին՝ մեր համատեղ հետևողական աշխատանքի շնորհիվ: Բոլորս միասին, իրար հետ՝ մեծով ու փոքրով, գյուղով ու քաղաքով:
Լայն փոփոխությունների ժամանակն է մեր երկրում»,-հայտարարել է ՀՀԿ նախագահը և ընտրողներին կոչ արել լիարժեք արդյունքի հասնելու համար հավատալ Հանրապետականին, հավատալ սեփական ուժերին և միասին փոխել Հայաստանը, այն դարձնել ավելի լավը յուրաքանչյուրի համար:
Նորք-Մարաշ վարչական շրջանի մշակույթի տանը ընտրողների հետ հանդիպման ժամանակ Նախագահ Սերժ Սարգսյանը պատասխանել է նրանց հետաքրքրող հարցերին:
