Երևանի թիվ 1 տուն-ինտերնատին կից ստեղծելով անօթևանների կացարան՝ ՀՀ աշխատանքի և սոցիալական հարցերի նախարարության հաշմանդամների և տարեցների հիմնահարցերի վարչությունը կիսով չափ կարողանում է անօթևաններին օգնել: Վարչության պետի տեղակալ Անահիտ Գևորգյանն այսօր լրագրողների հետ հանդիպման ժամանակ նշեց, որ կացարանը 2006 թվից մինչ օրս սպասարկել է շուրջ 1260 անօթևանի, իսկ թիվ 1 տուն-ինտերնատի փոխտնօրեն Արթուր Մարկոսյանն ավելացրեց, որ իրենք կարողանում են սպասարկել 60 անօթևանի 60 օրով. «Անօթևանների կացարանը գործում է 2006 թվից, և մենք կարողանում ենք սպասարկել միայն 60 հոգու, որովհետև մեր շենքային պայմանները թույլ չեն տալիս շատ անօթևանների օգնել: 60 օր հետո այդ 60 անօթևանները դուրս են գրվում, նրանց փոխարեն նոր անօթևաններ են գալիս: Մենք սպասարկում ենք 18 տարեկանից բարձր թե՛ կին, թե՛ տղամարդ անօթևանների»:
Անօթևաննների կացարանը 60 օրվա ընթացքում առաջնահերթ կարգի է բերում անօթևանների սանիտարական վիճակը, որից հետո զբաղվում անձնագրային, փաստաթղթային հարցերով: Կացարանի 15 աշխատակիցներն օգնում են նաև, որպեսզի անօթևանները տուն վերադառնան:
«Մեզ դիմողներից 20-25 տոկոսի խնդիրները հիմնովին լուծվում են, նրանք այլևս անօթևան չեն մնում և մեզ չեն դիմում: Մոտ 50 տոկոսը դիմում են կրկնակի, այսինքն՝ նույն մարդը, որի հարցը որևէ կերպ չի լուծվել, 2 ամիս մեզ մոտ մնալուց հետո հնարավորություն ունի կրկին դիմելու: Մենք ունենք սոցիալական աշխատող, հոգեբան, իրավաբան, որոնք զբաղվում են բոլոր հարցերով: Կարողացել ենք ընտանիք վերադարձնել 22 հոգու, իսկ աշխատանքի է ընդունվել 20 անօթևան»: