Թիվ 11 ընտրատարածքում պատգամավորի թեկնածու Արշակ Բանուչյանի նախընտրական շտաբի տարածած հաղորդագրությունից տեղեկանում ենք, որ ապրիլի 23-ին հանդիպում է տեղի ունեցել Հայ ազգային կոնգրես դաշինքի և ՀՅԴ կուսակցության Շենգավիթի նախընտրական շտաբների պատասխանատուների միջև: Հայ ազգային կոնգրեսից հանդիպմանը մասնակցել է թիվ 11 ընտրատարածքում մեծամասնական ընտրակարգով առաջադրված պատգամավորի թեկնածու Արշակ Բանուչյանն ու Շենգավիթի շտաբի պատասխանատու Վոլոդյա Հովհաննիսյանը, իսկ ՀՅԴ-ից ԳՄ անդամ, ԱԺ պատգամավոր, ՀՅԴ Շենգավիթի շտաբի պատասխանատու Արա Նռանյանը:
Կողմերը մտքեր են փոխանակել ներքաղաքական իրավիճակի, նախընտրական զարգացումների, մասնավորապես, Շենգավիթ համայնքում տիրող իրավիճակի վերաբերյալ: Կոնգրեսի և ՀՅԴ-ի ներկայացուցիչները ձեռք են բերել պայմանավորվածություն` Շենգավիթ համայնքում ընտրակեղծիքների դեմ միասնական պայքար ծավալելու, ընտրությունների օրը ընտրատեղամասերում վերահսկողություն սահմանելու և այլ հարցերի շուրջ:
Կոնգրեսի և ՀՅԴ ներկայացուցիչները պայմանավորվել են նման հանդիպումները պարբերական դարձնելու մասին: