Հռոմի պապ Բենեդիկտոս 16-րդը շփման համաշխարհային օրվա կապակցությամբ հրապարակված ուղերձի մեջ իր վերաբերմունքն է արտահայտել սոցիալական ցանցերում շփման վերաբերյալ: Այս մասին հաղորդում է Վատիկանի պաշտոնական կայքը:
Հիշեցնենք, որ Հռոմի պապը բավականին առաջադեմ է և Youtube կայքում ունի սեփական ալիքը, իսկ անցած տարվա ուղերձում կոչ էր արել եկեղեցականներին քարոզել բոլոր հնարավոր նորարարական միջոցներով, այդ թվում՝ ինտերնետի տրամադրած հնարավորություններով:
Հռոմի պապն ուղերձում նշել է, որ շփումը սոցիալական ցանցերում հնարավորություն է տալիս հաստատել նոր ծանոթություններ, օգնում է փոխանակել գիտելիքներ, երկխոսություն հաստատել տարբեր մշակույթների միջև:
Չնշելով կոնկրետ սոցիալական ցանցերի մասին` Հռոմի պապը միաժամանակ զգուշացրել է «զուգահեռ իրականության մեջ ընկղմվելու» վտանգավորության մասին: «Մնացեք հավատարիմ ինքներդ Ձեզ և մի ստեղծեք պրոֆայլներ սոցիալական կայքերում, որոնք չեն արտահայտում մարդու իրական բնավորությունը»,- նշել է նա:
