Ակցիային մասնակցում էին Հրազդանի, Մալաթիայի տոնավաճառների առևտրականները, որոնք բողոքում էին, որ բարձրացվել են նաև Չինաստանից ներկրվող ապրանքի համար վճարվող գումարները՝ 1 կգ-ի համար 7 դոլարից դառնալով14 դոլար: Կառավարության աշխատակազմից հայտնել էին, որ այս ամենի մեղավորը բեռնափոխադրող ընկերությունն է, սակայն առևտրականները այդ ընկերությունից ճշտել են, որ այն բացարձակապես կապ չունի դրա հետ։ Ավելին, ընկերությունից արձագանքել են. «Մենք չէինք ցանկանա՝ մեր գործը վատանա»: Մալաթիա տոնավաճառի բաժնետեր Սամվել Ավետիսյանը պահանջում էր իր առևտրականներից դադարեցնել բողոքը՝ ասելով, թե ինքը կարող է այլ պայմաններ առաջարկել:
Նշենք, որ ցուցարարները բողոքել են նաև տոնավաճառների ղեկավարությունների ներքին արգելքներից. ըստ առևտրականների` օրինակ, «Ռոսիա» տոնավաճառի ղեկավարությունը խստիվ արգելել է իր մոտ աշխատող առևտրականներին մասնակցել բողոքի ցույցին` սպառնալով, որ մասնակցելու դեպքում նրանք տոնավաճառի տարածքում այլևս տեղ չեն ստանա:
Այսօր կառավարության դիմաց բողոքի ակցիա են անցկացնում Մալաթիա և Հրազդան տոնավաճառների առևտրականները և փողոցային առևտրով զբաղվողները: Առաջինները բողոքում են, որ բարձրացվել են Թուրքիայից ապրանք ներկրելու գները, որ1 կգ ապրանքի գինը 4 դոլարից դարձել է 8 դոլար: Բողոքի ակցիային հետևում են ոստիկանները` Ռոբերտ Մելքոնյանի գլխավորությամբ: Վարչապետի աշխատակազմի ղեկավարի պաշտոնակատար Տիգրան Գևորգյանը ընդունեց առևտրականներից երեքին և խոստացավ մինչև աշխատանքային օրվա ավարտը նրանց պատասխան տալ: