Համաձայն ՀՀ էկոնոմիկայի նախարարության զբոսաշրջության վարչության տրամադրած տվյալների` Հայաստանում արդեն իսկ որակավորված 22 հյուրանոցներից 8-ը զբոսաշրջային տներ են, իսկ 14-ը` հյուրանոցներ:
Հանրապետությունում ներկայումս գործում են 6 երեքաստղանի հյուրանոցներ` «Կոնգրեսը», որը հանրապետությունում առաջինն է որակավորման համար դիմել կառավարություն, «Ռեժինեն», «Օլիմպիան», «Էրեբունին», «Վալենսիան» և «Հարսնաքարը»: Նաև ունենք որակավորված 4 չորսաստղանի հյուրանոցներ` «Անի պլազա», «Արմենիան Ռոյալ փելես», «Մետրոպոլ» և «Արարատ» հյուրանոցները, և ընդամենը 2 հինգաստղանի` «Գոլդեն փելես» և «Լաթար» հյուրանոցները: Հանրապետությունում մեկաստղանի հյուրանոցներ էլ ունենք` «Նոր Ռեժանսը», «Վալեն Պլազը» և «Սենյորը», իսկ երկուաստղանի ընդամենը մեկն է` «Նոր Ձորաբերդ» հյուրանոցը:
Հինգաստղանի հյուրանոցների քչությունը հանրապետությունում պայմանավորված է այն հանգամանքով¸ որ, բացի սահմանված բոլոր մնացած չափանիշներից, հինգաստղանիի կարգավիճակ ստանալու համար հյուրանոցը, ըստ տարվա եղանակների, պետք է համարներում ապահովի հայկական թարմ մրգերի, չրերի և հանքային ջրերի տեսականի, որպեսզի զբոսաշրջիկները պատկերացում կազմեն Հայաստանում արտադրվող ապրանքների մասին:
Բարձրակարգ հյուրանոցները պետք է պարտադիր ունենան լողավազան, օդափոխման համակարգ, ավտոմեքենաների կայանատեղի, մանր ապրանքների և անձնական հիգիենայի պարագաների վաճառակետ, ամառային, ձմեռային այգիներ, սենյակները կահավորված լինեն համապատասխան կահույքով օբյեկտի շրջակայքը պետք է լինի բարեկարգ,և այլն: Այս ամենի մեջ ամենակարևորներից մեկն էլ այն է, որ որակավորում ստանում են միայն այն հյուրանոցները, որոնք ունեն հաշմանդամների համար հարմարեցված մուտք: Կան, իհարկե նաև, չգրված կանոններ. օրինակ` եթե վարագույրները կեղտոտ են, կամ սպառողը կոպիտ պատասխանի է արժանանում հյուրանոցի ադմինիստրատորի կողմից, դա արդեն հիմք կարող է հանդիսանալ, որ տվյալ սուբյեկտի որակավորման կարգը իջեցվի:
