Այսօր Կոմկուսի առաջնորդ Ռուբեն Թովմասյանի ասուլիսը ընդմիջեց ոմն Մյասնիկ Պատվականյան, որը խնդրեց թույլ տալ իր խոսքը ասել Կոմկուսի առաջնորդին: Նա նշեց, որ Ռուբեն Թովմասյանը զբաղված է խաբեությամբ և իր բարեկամ թափթփուկներին բերել-լցրել է Կոմկուս ու զբաղվում է հակաքարոզչությամբ:
Երկու անձինք, ովքեր, ամենայն հավանականությամբ, Կոմկուսի անդամներ էին, հրելով և գրեթե ծեծելով նրան դուրս բերեցին մամուլի ակումբից:
Լրագրողների հետ խոսելիս Մյասնիկ Պատվականյանը նշեց, որ Ռուբեն Թովմասյանը իրեն խաբել է՝ խոսք է տվել ընդգրկել Կոմկուսի համամասնական ցուցակում, սակայն չի արել:
Ռուբեն Թովմասյանը միջադեպը մեկնաբանեց հետևյալ կերպ. «Այս ասուլիսը վերաբերում է թղթակիցներին, և ոչ ոք իրավունք չունի այստեղ մտնելու: Սրանից պետք է հետևություն անել և պաշտպանել մամուլի ակումբները»:
Կոմկուսի առաջնորդն ասաց, որ այս մարդը բողոքներով դիմել է իրեն՝ իր հայրական տան հողային խնդիրները լուծելու համար, և ինքը նրան օգնել է: Ռ. Թովմասյանը հերքեց այն հանգամանքը, թե խոսք է տվել Պատվականյանին ընդգրկել համամասնական ցուցակում:
«Ես չեմ պատրաստվում արդարանալ»,- հավելեց նա:
Այն մարդիկ, ովքեր հրելով դուրս էին հանել Պատվականյանին, կարծելով, թե լրագրողները հեռացել են, ասացին՝ դու մեռար: