«Այդ խնդիրը եղել է միշտ, դրա լուծման ձևերն ու եղանակներն էլ տարբեր են, և տարբեր քաղաքապետներ տարբեր ձևերով փորձել են պայքարել, բայց ինչ-ինչ պատճառներով տեղի չի ունեցել»,- փողոցային առևտրի վերացման մասին խոսելով` «Առաջին լրատվականի» հետ զրույցում կարծիք հայտնեց նախկին քաղաքապետ Վահագն Խաչատրյանը:
Խաչատրյանի կարծիքով, խնդիրն ավելի գլոբալ է. «Այդ մարդիկ իրենց կամքով չեն զբաղվում փողոցային առևտրով, իհարկե ստիպված են, ոչ ոք չի գնա, մի քանի լիմոն վաճառելու համար ամբողջ օրը կանգնի փողոցում: Եթե Երևան քաղաքում դրա կարիքը կա, մարդիկ օգտվում են, ապա պետք է մտածել ընդհանրապես փողոցային առևտուրը կանոնակարգելու խնդիրը լուծելու մասին»:
Անցած շաբաթ փողոցային առևտուրը ոստիկանության միջոցով արգելելը, Խաչատրյանը որակեց որպես հերթական շոու-ներկայացումը, որով քաղաքային իշխանությունները փորձում են ցույց տալ, թե քաղաքապետարանը Երևանի արտաքին տեսքի մասին է մտածում: Խաչատրյանի խոսքերով, արտաքին առևտուրը աշխարհում ընդունելի է և միշտ էլ եղել է. «Թերթերի վաճառքը աշխարհի ոչ մի երկրում տեղի չի ունենում փակ կրպակներում, գյուղատնտեսական մթերքների վաճառքը փողոցում ևս շատ ընդունելի ձև է: Թող գնան Նյու Յորք, Վաշինգտոն, Լոնդոն կամ Փարիզ, կտեսնեն, որ դա արվում է, բայց կանոնակարգված ձևով: Ի վերջո, չեմ կարծում, որ այդ խնդիրը պետք է լուծվեր հենց հունվար ամսին, նույնիսկ Խորհրդային Միության տարիներին խնդիրները ձմռանը չէին լուծվում»: Վահագն Խաչատրյանը նշեց, որ քաղաքապետարանը պետք է կանոնակարգեր, մշակեր ձևեր և այդ մարդկանց զգուշացներ, որ ասենք մարտ ամսից առևտրի այս ձևը այլևս չի գործելու. «Ես գնահատում եմ, որ սա պոպուլիզմ էր և շատ բնորոշ բռնապետական երկրին, որտեղ աշխատելու փոխարեն պարզապես ներկայացումներ են անում: Մի տեղ տոնածառն է 2 մետր բարձր, կամ լույսերն ավելի լուսավոր են, քան Փարիզինը, բայց դրա փոխարեն նրանք կարող են Երևան քաղաքի կենտրոնը այլանդակել, պատմությունը վերացնել, ռուսերենը պարտադիր լեզու դարձնել քաղաքապետարանի գործունեության մեջ»:
