«Առաջին լրատվականը» երեկ տեղեկացրել էր, որ հայազգի հայտնի երգիչ Շառլ Ազնավուրը կոչ էր արել Իսրայելին ճանաչել Հայոց ցեղասպանությունը, իսկ Թուրքիան անվանել էր «քարանձավային հակասեմականության» աղբյուր: Այս խոսքերը նա հնչեցրել էր Երուսաղեմի համալսարանին Փարիզում Prix Scopus 2011 ամենամյա մրցանակը հանձնելուց հետո:
Երեկ շվեյցարական թերթերից մեկին տված հարցազրույցում նա մեղադրել է Ֆրանսիային Հայոց ցեղասպանության վերաբերյալ դիրքորոշումը չփոխելու համար: Ազնավուրն ասել է, թե ինքը վրդովված է Ֆրանսիայի նախագահի պահվածքից` նշելով, որ Սարկոզին ճիշտ չէ և հիշեցնելով նրան, որ հայկական համայնքը Ֆրանսիայում ավելի մեծ է, քան թուրքականը: Հայերն արյուն են թափել Ֆրանսիայի համար: Նա ասել է, որ առաջին անգամ է այդ մասին խոսում, սակայն եթե Սարկոզին իր դիրքորոշումը չփոխի, ինքն անընդհատ բարձրացնելու է այս հարցը:
Ազնավուրն այս քայլով ընդդիմանում է Սարկոզիին, որը թուրքական իշխանություններին հավաստիացրել է, որ Հայոց ցեղասպանության ժխտման համար պատիժներ կիրառելու օրինագիծը Սենատում չի ընդունվի: Այս մասին հայտնի էր դարձել WikiLeaks-ի հրապարակումներից (Սարկոզին նախքան ընտրվելը 2007թ. հայկական համայնքին խոստացել էր, որ ընտրվելու դեպքում հետամուտ կլինի, որպեսզի այդ օրինագիծը կյանքի կոչվի):
«Մենք՝ հայերս, այս երկրում 400-500 հազար ենք, և ես գիտեմ, ու բոլորը գիտեն, որ նրանք բոլորն իմ կողքին են լինելու: Ես քաղաքական գործիչ չեմ, սակայն կարևոր քաղաքական խնդիր ունեմ: Ես գիտեմ, որ կյանքս եմ վտանգում, սակայն ասում եմ այս ամենը: Բայց հաշվի առնելով տարիքս՝ արդյո՞ք սա ինձ համար ռիսկ է»,- ասել է Շարլ Ազնավուրը:
