Անկախ նրանից, որ «ընտրություն չկա» փիլիսոփայությունն անփոփոխ է մնալու, ամեն դեպքում, մարդիկ կյանքը փոխելու համար փորձում են բոլոր առիթներն օգտագործել և այդ իմաստով նրանց նախընտրական ակտիվությունն ուժեղանում է: «Առաջին լրատվական»-ի հետ զրույցում ասաց «Ղարաբաղ» կոմիտեի անդամ, ՀՀ առաջին նախագահ Լևոն Տեր-Պետրոսյանի անվտանգության հարցերով նախկին խորհրդական Աշոտ Մանուչարյանը:
«Ժողովրդի աչքում ներկա իրավիճակը ստեղծելու պատասխանատվությունը կրող իշխող հիմնական ուժերը, առաջին հերթին Հանրապետականը և նրա հետ անմիջական կապ հաստատողները հասարակական գիտակցության մեջ կորցնողի դերում են, մինչդեռ ավելանում են այն ուժերի հնարավորությունները, որոնք հանդես են գալիս փոփոխության դրոշի տակ՝ անկախ նրանից փոփոխությունները ռեա՞լ են, թե ոչ: Ես նկատի ունեմ ԲՀԿ-ին, ՀԱԿ-ին, «Ժառանգությանը»,- ասաց նա:
Մանուչարյանի խոսքով՝ Հայաստանի ներքաղաքական զարգացումներում արտաքին ուժերի ներգրավվածության գործոնը գնալով մեծանում է: Եվ այն, որ հայաստանյան ուժերը չեն կարողանում նոր իշխանություն ձևավորելու տեխնոլոգիա մշակել, բերում է նրան, որ արտաքին ուժերը հատուկ դերակատարում են ստանում: «Առաջին հարցը, որ բոլորին հետաքրքրում է, հետևյալն է. 2007 թվականին Հայաստանում մի ինքնաթիռ վայրէջք կատարեց, որը փոխեց ընտրությունների արդյունքները: Քաղաքական բոլոր ուժերի մեջ կասկած կա՝ լինելո՞ւ է այս անգամ նման ինքնաթիռ, թե՞ չի լինելու»,- ասաց Աշոտ Մանուչարյանը:
Անդրադառնալով հարցին՝ ինչո՞ւ «Ժառանգությունը» որոշեց առկախել իր մասնակցությունը ընտրությունները վերահսկող հանրային շտաբում, «Ղարաբաղ» կոմիտեի անդամը նշեց. «Այդ կուսակցությունն աշխարհաքաղաքական իմաստով Արևմուտք ուղղված ուժ է, իսկ ընդդիմադիր կեցվածքի իմաստով՝ փոփոխությունների հարող: «Ժառանգության» ընդդիմադիր կեցվածքը պահանջում էր մասնակցել շտաբի աշխատանքներին, մինչդեռ աշխարհաքաղաքական ուղղվածությունը՝ հրաժարվել դրանից: Սա էր պատճառը, որ այդ կուսակցությունը նմանօրինակ որոշում ընդունեց՝ առաջին տեղ դնելով աշխարհաքաղաքական ընտրությունը, միաժամանակ, չցանկանալով ամբողջությամբ կորցնել ընդդիմադիր կեցվածքը, ցույց տալով, որ ինչ-որ կապ շտաբի հետ պաշտպանում է»:
