Եգիպտոսի ներքին գործերի նախարարության տվյալներով, Ալեքսանդրիայում գտնվող քրիստոնեական եկեղեցու պայթյունն իրականացրել է «Իսլամական բանակ» խմբավորումը, որը կապված է «Ալ-Ղաիդա» միջազգային ահաբեկչական խմբավորման ցանցի հետ: Նախարարության ղեկավար Հաբիբ Ալ-Հիդլին հայտնել է, որ իշխանությունները տիրապետում են անհերքելի փաստերի, որոնք ապացուցում են խմբավորման` այս ահաբեկչությանն առնչություն ունենալու մասին:
«Իսլամական բանակի» ներկայացուցիչները, սակայն, հերքել են այս լուրը` միևնույն ժամանակ «շնորհավորելով այն իրականացնողներին»:
Այս գործում գլխավոր կասկածյալը 28-ամյա եգիպտացի Ահմեդ Իբրահիմն է, որը 2008 թ.-ից խմբավորման հետ աշխատում էր Գազայի շրջանում: Գործով անցնում են նաև Եգիպտոսի 5 քաղաքացիներ:
Պայթյունը տեղի է ունեցել ամանորյա արարողությունների ժամանակ: Այն դարձել է 23 մարդու մահվան պատճառ: Դրա հետևանքով բախումներ տեղի ունեցան եգիպտացի քրիստոնյա-ղպտիների, մուսուլմանների և ոստիկանների միջև, հայտնում է BBC-ն: