«Առաջին լրատվական»-ի զրուցակիցն է Հայ ազգային կոնգրեսին մաս կազմող «Ժողովրդավարական ուղի» կուսակցության նախագահ Մանուել Գասպարյանը:
– Պարոն Գասպարյան, տևական ժամանակ Հայ ազգային կոնգրեսը հանրահավաքային դադար է հայտարարել: Ըստ Ձեզ` ընդդիմությունը չի՞ կորցրել իր համակիրներից շատերին, որոնք ձգտում են արագ փոփոխությունների: Նկատի ունենանք, որ Տիգրան Կարապետյանին էլ է այսօր հաջողվում բազմամարդ հանրահավաքներ անցկացնել:
– Միշտ էլ կգտնվեն մարդիկ, որոնք փոփոխական են իրենց քաղաքական կողմնորոշումներում: Նրանք այն մարդիկ են, որոնք հույսը դնում են իշխանություններին ընդդիմացող ուժերի վրա և պատրաստ են գնալ այն քաղաքական ուժի հետևից, որը տվյալ պահին դեմ կարտահայտվի իշխանությանը: Հաշվի առնենք, որ օր օրի աճում է ժողովրդի դժգոհությունը` կապված սոցիալ-տնտեսական ճգնաժամի հետ: Մարդիկ չեն տեսնում իրենց վաղվա օրը և դրանից դրդված էլ կարող են շատ ավելի վճռական և անկանխատեսելի քայլերի դիմել: Համամիտ եմ, որ այսօր հասարակությունն ավելի մեծ սպասելիքներ ունի Հայ ազգային կոնգրեսից: Այդ առումով պատահական չեմ համարում, որ Տիգրան Կարապետյանն էլ կարողացավ մարդաշատ հանրահավաք անցկացնել: Չմոռանանք, որ շատերին վրդովեցրեց նաև «ԱԼՄ» հեռուստաընկերության եթերազրկումը, որն այդ մարդկանց կողմից դիտարկվում էր որպես տեղեկատվություն ստանալու միջոց:
– Հայ ազգային կոնգրեսում կան ինչպես արմատական գործողությունների կողմնակիցներ, այնպես էլ ոչ արմատական, ոչ հեղափոխական լուծումներ առաջարկողներ: Դուք ո՞ր խմբի մեջ եք մտնում:
– Խելամիտ, վճռական: Իհարկե, ՀԱԿ-ում տարբեր տեսակետներ և մոտեցումներ ունեցող անձինք են հավաքված, և նրանց տեսակետները հաշվի են առնվում: Ես կողմնակից եմ վճռական, բայց խելամտորեն հաշվարկված քայլեր անելուն:
– Օրերս, օրինակ, «Սարդարապատ» շարժման անդամ Ժիրայր Սեֆիլյանը հայտարարեց, որ ընտրություններով հնարավոր չէ մեր երկրում լուծել իշխանափոխության հարցը, և այդ հարցը կարող է լուծվել միայն փողոցում:
– Կարծում եմ, որ եթե իշխանությունները շարունակեն անտեսել հասարակության պահանջները, ժողովուրդը ինքը ոտքի կկանգնի իր հարցերը լուծելու համար և հաշվի չի առնի ոչ իշխանության պահանջները, ոչ էլ ընդդիմության: Այդ դեպքում կարող են մեր երկրում էլ կրկնվել Թունիսի և աֆրիկյան մյուս երկրների իրադարձությունները, և ընդդիմադիր ուժերի հորդորին չեն հետևի:
– Դուք մտավախություն չունե՞ք, որ, եթե անցկացվեն ընտրություններ, իշխանությունը կարող է վերարտադրվել նույն մեթոդներով, ինչպես վերարտադրվել է անցած ընտրություններում: