ՄԱԿ-ի գլխավոր քարտուղար Պան Գի Մունը կոչ է արել Սուդանի և վերջերս անկախություն ստացած Հարավային Սուդանի իշխանություններին անմիջապես վերսկսել բանակցությունները՝ հարավսուդանական բանակը Հեգլիգ սահմանամերձ շրջանից դուրս բերելու ուղղությամբ: Այս մասին հաղորդում է RIA Novosti-ն՝ վկայակոչելով կազմակերպության մամուլի ծառայությունը:
«Գլխավոր քարտուղարը նաև երկու կառավարություններին կոչ է արել գործի դնել սահմանի համատեղ որոշման և մոնիտորինգի մեխանիզմը՝ սահմանամերձ շրջաններում անվտանգություն ապահովելու համար»,- ասվում է հաղորդագրության մեջ:
Մամուլի քարտուղարության տվյալներով՝ Պան Գի Մունը նաև կոչ է արել Սուդանի կառավարությանը դադարեցնել հարավսուդանական տարածքների ռմբակոծությունը և առաջարկել է կողմերին այլևս չաջակցել ապստամբական խմբավորումներին:
Հարավային Սուդանի նախագահ Սալվա Կիիրը իր զորքերին հրամայել է նահանջել վիճելի Հեգլիգ շրջանից, որտեղ վերջին օրերին դաժան մարտեր են ընթանում հարավսուդանական և սուդանական զորքերի միջև: Զորքերի դուրսբերումը պետք է իրականացվի 3 օրվա ընթացքում:
Հարավային Սուդանը փորձում է միջազգային արբիտրաժի ճանապարհով սահմանել Հեգլիգի կարգավիճակը: Հարավսուդանական զորքերը ապրիլի 12-ին ներխուժեցին նավթով հարուստ Հեգլիգի շրջան, որը Հաագայի միջնորդ դատարանի մշտական պալատի որոշմամբ կցվել է Սուդանի տարածքին:
Մինչ այս պահը սուդանական բանակը մի քանի անհաջող քայլեր է ձեռնարկել այդ շրջանը հետ վերցնելու ուղղությամբ: Տեղի ունեցած բախումներում տարբեր տվյալներով զոհվել է 230 սուդանցի, Հարավային Սուդանի ավելի քան 100 զինծառայող:
Խարտումը բողոք է հղել ՄԱԿ-ի ԱԽ Հարավային Սուդանի գործողությունների դեմ: Արաբական և մի շարք այլ երկրներ դատապարտել են Հարավային Սուդանի գործողությունները:
Սուդանի իշխանությունները Հարավի հետ բանակցությունները դադարեցնելու մասին հայտարարեցին այն բանից հետո, երբ նավթով հարուստ սահմանամերձ շրջաններում վերսկսվեցին բախումները:
