Պակիստանում էլեկտրահարությամբ սպանել են պակիստանցի աղջկան, որը սիրահարվել է` առանց հոր թույլտվության

Պակիստանյան հեռուստաալիքները, հղում կատարելով ոստիկանության իրենց աղբյուրներին, հայտնում են, որ պակիստանցի մի աղջկա ծնողները հոսանքահարել և սպանել են նրան այն բանի հանար, որ աղջիկն առանց իրենց համաձայնության ցանկանում էր ամուսնանալ:
Ըստ ԶԼՄ-ների հայտնած տեղեկությունների` 17-ամյա աղջիկը` Սայմա Բիբին, սպանվել է Պակիստանի արևելքում գտնվող Բհավալփուր շրջանում` այն բանից հետո, երբ տեղական փանչայատը (գյուղական խորհուրդ) նրան մեղավոր է ճանաչել «ընտանիքի պատիվը գետնով տալու համար»: Աղջկա «մեղքը» սոսկ այն էր, որ նա սիրել է և ցանկացել ամուսնանալ «ոչ հարմար» (ընտանիքի ավագների կարծիքով) տղամարդու հետ` դեմ գնալով ընտանիքի կարծիքին:
«Մենք նրա մարմնի վրա հայտնաբերել ենք բռնության հետքեր, ինչպես նաև այրվածքներ վզի, մեջքի և ձեռքերի հատվածում, որը վկայում է, որ նրան, ամենայն հավանականությամբ, սպանել են հոսանքով»,- DoonNews-ը մեջբերում է տեղի ոստիկանության սպա Զահուրա Ռաբանիի խոսքերը:
Ինչպես հայտնում է հեռուստաալիքը, երկրի վարչապետ Յուսուֆ Ռեզա Գիլանին ոստիկանությունից պահանջել է անցկացնել մանրամասն քննություն և պատժել մեղավորներին: Ոստիկանությունն արդեն ձերբակալել է աղջկա հորն ու հորեղբորը:
Սայմա Բիբիի սպանությունը կատարվել է «քարո-քարի» ավանդույթի համաձայն, որը նշանակում է «սպանություն պատվի համար»: Ըստ այդմ` աղջկա ծնողներն իրենց իրավունք են վերապահում սպանել նրան, եթե նա, ըստ իրենց, վարկաբեկել է ընտանիքը:
Իրավապաշտպանների և Պակիստանում կանանց և երեխաների օգնության առաջին թեժ գծի` «Մադադգար» (ուրդուից թարգմանաբար նշանակում է «Օգնական»), տեղեկություններով, անցյալ տարի 450 կին դարձել է «քարո-քարիի» զոհ: