23:46 Ինչպես լրագրողներին հայտնել է ՌԴ Քննչական ծառայության պաշտոնական ներկայացուցիչ Վլադիմիր Մարկինը, Դոմոդեդովո օդանավակայանի պայթյունի ժամանակ զոհվել է Մեծ Բրիտանիայի երկու քաղաքացի:
«Մեծ Բրիտանիայի առնվազն երկու քաղաքացի է եղել պայթյունի էպիկենտրոնում»,- ասել է Մարկինը: Այս մասին հաղորդում է РИА-Новости գործակալությունը: Մարկինը նաև հայտնել է, որ պայթուցիկ սարքի ուժգնությունը կազմել է 2-5 կգ տրոտիլ: Այսպիսով, ռուս իրավապահները պաշտոնապես հայտարարեցին, որ Դոմոդեդովոյում տեղի է ունեցել ահաբեկչական գործողություն:
Ինչպես փոխանցում են ռուսական լրատվամիջոցները, բացի զոհված երկու բրիտանացիներից, տուժածների մեջ կան Ֆրանսիայի, Սլովակիայի և Իտալիայի քաղաքացիներ:
23:30 ԱԻՆ-ը հայտնում է, որ Մոսկվայի թիվ 13 հիվանդանոցում հոսպիտալիզացվել է Գուրյան Վարդանի Խաչատուրովը (ծնված 1946թ.), ինչպես նաև Յուրի Ալբերտի Վարդանյանը (ծնված 1953թ,)` թիվ 71 հիվանդանոցում:
22:30 Ինչպես հայտնում է РИА-Новости կայքը, Մոսկվայի Դոմոդեդովո օդանավակայանում տեղի ունեցած պայթյունից տուժածների մեջ այս պահին հայտնի է մեկ հայի անուն: Դա 1969թ. ծնված Կարեն Միխայիլի Գալստյանն է, որը բնակվում է մերձմոսկովյան Կրասնոգորսկի շրջանում: Տուժածը գտնվում է Մոսկվայի թիվ 64 հիվանդանոցում:
20:37 Вести հեռուստաալիքի փոխանցմամբ, զոհվածների թիվը հասել է 35-ի, ևս 46 մարդ գտնվում են ծանր վիճակում:
20:17 Ինտենետում հայտնվել է առաջին տեսանյութը դեպքի վայրից. http://www.youtube.com/watch?v=BdA9rk_pXQk&sns=tw
20:10 РИА-Новости գործակալությունը հայտնում է, որ վիրավորների թիվն անցել է 150-ից: Հայտնի է նաև, որ 35-ը գտնվում են ծանր վիճակում:
20:04 Եթե Դուք տվյալ պահին ծանոթներ եք ունեցել Դոմոդեդովո օդանավակայանում կամ ցանկանում եք այլ տեղեկություն իմանալ տուժածների մասին, կարող եք զանգել +7495 3636101, +7495 6444066
19:50 Ռուսաստանի Դաշնության նախագահ Դմիտրի Մեդվեդևը հետաձգել է իր այցը շվեյցարական Դավոս քաղաք, ուր պետք է մասնակցեր ամենամյա տնտեսական համաժողովին:
19:46 Interafax գործակալությունը հայտնում է, որ ըստ իրավապահների` պայթյունն իրականացրած անձը հավանաբար Կովկասից է, ինչի մասին են վկայում ականատեսների վկայությունները: Ռուսաստանի Դաշնության նախագահ Դմիտրի Մեդվեդևը կարգադրել է ուժեղացնել վերահսկողությունը տրանսպորտային հանգույցներում: Այս պահին հատուկ ռեժիմով են գործում ՌԴ մայրաքաղաք Մոսկվայի մյուս օդանավակայանները:
19.05 Այս պահի դրությամբ կարող ենք ասել, որ Երևանից Դոմոդեդովո օդանավակայան պայթյունի ժամին չվերթներ չեն եղել: Հերթական օդանավը Դոմոդեդովոյում պետք է վայրէջք կատարի Երևանի ժամանակով
20:50: պայթյունի պահին օդանավեր էին ժամանել Լոնդոնից, Բրյուսելից, Բաքվից, Դուշանբեից: Ժամանման սրահը, որտեղ տեղի է ունեցել պայթյունը, սովորականից շատ մարդ է եղել, քանի որ այդ ժամն ամենածանրաբեռնվածներից է: Հայտնի է նաև, որ երկու պայթյուն է եղել, հանավաբար սա ահաբեկչություն է, և երկու մահապարտ ահաբեկիչ գործի են դրել 2 պայթուցիկ:
18:49 РИА-Новости գործակալությունը քիչ առաջ հայտնեց 31 զոհի, 130 վիրավորի մասին: Այս տեղեկությունը գործակալությունը ստացել է Ռուսաստանի առողջապահության նախարարությունից:
18:36 ITAR-TASS գործակալությունը հայտնում է, որ պայթյունի հետևանքով զոհվածների թիվը հասել է 20-ի: Բլոգները հայտնում են 70 զոհի մասին, սակայն այս տեղեկությունները ճշտված չեն: Դոմոդեդովո ուղևորվող բոլոր օդանավերը վայրէջք են կատարում Մոսկվայի Շերեմետևո և Վնուկովո օդանավակայաններում:
18:27 Ինչպես հաղորդում են ռուսական լրատվամիջոցները, Մոսկվայի Դոմոդեդովո օդանավակայանում տեղի է ունեցել հզոր պայթյուն: Պաշտոնապես չի հայտնվում զոհերի և վիրավորների մասին: Սակայն RBC-ն հայտնում է, որ կան զոհեր, իսկ վիրավորներին արդեն տեղափոխում են հիվանդանոցներ: Эхо Москвы ռադիոկայանը հայտնում է, որ կա առնվազն 10 զոհ, մի քանի տասնյակ մարդ վիրավորվել է: РИА-Новости լրատվական գործակալությունը հայտնում է, որ զոհերին դուրս են բերում բեռների հանձման բաժնից: Այս պահին պարզ չէ պայթյունի պատճառը: Իշխանությունները չեն հայտնում նաև` սա ահաբեկչական գործողությա՞ն արդյունք է, թե՞ տեխնածին աղետ: «Առաջին լրատվական»-ը հետևում է դեպքերի զարգացմանը: Թարմ նորություն հայտնվելուն պես տեղյակ կպահենք դրանց մասին: