Լիբանանում քայլեր են ձեռնարկվում նոր կառավարություն ձևավորելու ուղղությամբ: Այսօր արդեն վարչապետի երկու թեկնածու կա` ներկայիս վարչապետ Սաադ Հարիրին և նախկին վարչապետ Նաջին Միքաթին: «Առաջին լրատվական»-ի հետ զրույցում լիբանանահայ բանաստեղծ-հրապարակախոս Սագո Արեանը նշեց, որ մինչ Միքաթիի առաջադրվելը` Լիբանանի ընդդիմությունն առաջադրել է նախկին վարչապետ Օմար Կարամեի թեկնածությունը, սակայն նրա շանսերը շատ փոքր էին, քանզի ընդդիմություն- իշխանություն քվեների տարբերությամբ ընդդիմության թեկնածուն կտապալվեր: Արեանի խոսքերով, Նաջին Միքաթին ավելի չեզոք, «բարեխառն» թեկնածու է. «Նա ընդունելի թեկնածու է նաև «Մարտի 14» դաշինքի համար: Բայց վիճակը շատ ծանր է, քանզի ոչ ոք չգիտի, թե ով է լինելու վարչապետ, իսկ եթե անգամ Միքաթին դառնա վարչապետ, ապա չի ընդունվի սուննի համայնքի մեծամասնության կողմից, ինչն էլ կհանգեցնի երկրում տագնապի առաջացման»:
Արեանը բացառեց քաղաքացիական պատերազմի հավանականությունը և ավելի վտանգավոր համարեց այն հանգամանքը, որ երբ հրապարակվի նախկին վարչապետ Ռաֆիկ Հարիրիի գործով միջազգային դատարանի դատավճիռը, այն սեպ կխրի «Հիզբոլլահի» և Լիբանանի ժողովրդի միջև. «Զինված պայքարի հնարավորությունը բացառվում է, որովհետև երկրի ներսում բանակը շատ ուժեղ է, իսկ «Հիզբոլլահը» միակ զինված ուժն է, որի կողմից որևէ զինված գործողություն կգնահատվի որպես ոչ հայրենասեր ուժի արած քայլ»:
Լիբանանի կառավարական ճգնաժամով միջազգային հանրության չափազանց հետաքրքրվածությունը, ըստ Սագո Արեանի, պատահական չէ. «Միջազգային ուժերը, հատկապես ԱՄՆ-ն, ուզում են, որ «Հիզբոլլահը» զինաթափվի, այդ գաղափարին աջակցում են նաև Ֆրանսիան և Կիպրոսը, ինչպես նաև Սաուդյան Արաբիան, որի դերակատարությունն ավելի թույլ է»:
