Այսօր Սիսիանի մշակույթի տան դահլիճում թիվ 37 ընտրատարածքում ՀՀԿ աջակցությունը վայելող Լիսկայի անձնական թեկնածու Հայկ Գրիգորյանը հանդիպել է Սիսիանի ընտրողների հետ: Հանդիպմանը «Առաջին լրատվական»-ի տեղեկություններով, ներկա է շուրջ 60 մարդ: Թեկնածու Հայկ Գրիգորյանը իր ելույթում բազում խոստումներ է տվել սիսիանցիներին. «Լինելով մանկավարժ` ծանոթ եմ այդ խնդիրներին, Ազգային ժողովում կփորձեմ բարձրացնել աշխատավարձերը, ամիսը երկու անգամ հանդիպումներ կունենամ տեղերում և կունենամ գրասենյակ»:
ՀՀԿ Սիսիանի նախընտրական շտաբի պետ Աշոտ Մինասյանը, որը նաև Սյունիքի մաքսատան տնօրենն է, ներկայացնելով 28-ամյա Հայկ Գրիգորյանին, մասնավորապես նշել է. «Մենք սիրում ենք քննադատել սրան-նրան, թե քաղաքը կեղտոտ է, աղբահանությունը լավ չէ` մոռանալով, որ այս քաղաքը միայն քաղաքապետինը չէ, պետք է մտածենք, որ ցելոֆանները շպրտելով չէ, պիտի ժողովուրդն ինքնագիտակցության գա: Երիտասարդության ժամանակներ են, պետք է այնպես անենք, որ այս Ազգային ժողովը չնմանվի «պոլիտբյուրոյի» նման ծերակույտի, պետք է երիտասարդացվի, և մեր թեկնածուն երիտասարդ, եռանդով, ավյունով լեցուն, խելոք տղա է»:
Նա կոչով դիմել է ներկաներին` ընտրել Հայկ Գրիգորյանին:
Հանդիպումից հետո, սակայն, դրսում ներկաներից մեկը զայրացած ու զարմացած հարցնում էր. «Այս պարոնը, որ ինքնագիտակցության կոչ է անում, ինքը երբ է ինքնագիտակցության գալու. կոչ է անում ընտրել մեկին, որին ինքն էլ չի ճանաչում»:
