Մարտի 12-ից ապրիլի 14-ն ընկած ժամանակահատվածում Հասարակայնության հետ կապերի հայաստանյան ասոցիացիան ԵԱՀԿ երևանյան գրասենյակի կողմից իրականացվող և ԵՄ-ի կողմից ֆինանսավորվող «Աջակցություն Հայաստանի երկու ընտրական գործընթացներին» ծրագրի շրջանակներում խորհրդարանական ընտրություններին ընդառաջ իրականացրել է տպագիր մամուլի մոնիթորինգ:
Այսօր լրագրողների հետ հանդիպմանը Հասարակայնության հետ կապերի հայաստանյան ասոցիացիայի գործադիր տնօրեն Տաթևիկ Փիրումյանը տեղեկացրեց, որ նշված ժամանակահատվածում հետազոտվել են Հայաստանում հրատարակվող 16 անուն թերթերի մոտ 2500 հոդվածներ, որոնք առնչվել են 2012 թվականի խորհրդարանական ընտրություններին:
Հետազոտությունների արդյունքում առանձնացվել են տպագիր լրատվամիջոցների կողմից խորհրդարանական ընտրությունների լուսաբանման օրինաչափություններն ու առանձնահատկությունները:
Ըստ բանախոս Արմեն Մինասյանի` ներկայացված հաշվետվության համաձայն` հայաստանյան տպագիր մամուլը մեծ հետաքրքրություն է ցուցաբերում ընտրական գործընթացի նկատմամբ:
«Այդուհանդերձ, շատ դեպքերում մամուլում արձանագրվել են անհավասարակշիռ, իրադարձությունների սուբյեկտիվ և ընտրանքային լուսաբանման դեպքեր: Դրանք դրսևորվում են գնահատականներ պարունակող վերնագրերով, ինչպես նաև ամենատարբեր մանիպուլյատիվ հնարքներով: Հաճախ են հեղինակի կողմից կողմնակալ վերաբերմունքի դրսևորման դեպքերը` գնահատական պարունակող մեկնաբանություններ, զրուցակիցներին ուղղորդող հարցադրումներ»,- նշեց բանախոսը` ընդգծելով, որ հանրագումարում տպագիր մամուլը ավելի շատ իրականացնում է քարոզչական, քան տեղեկատվական գործառույթ: Քաղաքական ուժերի և գործիչների օգտին կամ ի վնաս նրանց բացահայտ կամ քողարկված քարոզչություն պարունակող նյութերի ծավալը շատ թերթերում գերազանցում է հրապարակումների մեկ երկրորդը:
Նրա խոսքով` տպագիր մամուլում ամենից շատ հիշատակվել է ՀՀԿ-ն, որից 40 %-ը` բացասական ուղղվածությամբ, հաջորդը ԲՀԿ-ն է` 37% բացասական ուղղվածությամբ, ՀԱԿ-ը հիշատակվել է 12,1 % դրական ուղղվածությամբ և 41,9%` բացասական: «Ժառանգությունը», ՕԵԿ-ը և ՀՅԴ-ն տեղ են զբաղեցնում ՀՀԿ-ից և ԲՀԿ-ից հետո:
Նշված քաղաքական ուժերի գործունեությունը բավականին ինտենսիվ կերպով է լուսաբանվում տպագիր մամուլի կողմից:
Ինչ վերաբերում է ընտրարշավի մասնակից մյուս երեք կուսակցությունների` ՀԴԿ, ՀԿԿ, ՄՀԿ գործունեությանը, ապա նրանք ընդգծված կերպով ստվերում են և տպագիր մամուլի կողմից հիշատակվում են խիստ հազվադեպ»,- մանրամասնեց բանախոսը` հավելելով, որ «Իրավունք» թերթում ՀԱԿ-ն է հիշատակվում բացասաբար, իսկ «Հայկական ժամանակ»-ում` ՀՀԿ-ն:
Նա նաև նշեց, որ մեծամասնական ընտրակարգով գրանցված թեկնածուներին անդրադարձել են «Հայկական ժամանակ», «Հրապարակ», «ժամանակ», ՉԻ և «Ժողովուրդ» թերթերը:
Նշենք, որ հետազոտվել են 16 անուն թերթեր` «Ազգ», «Առավոտ», «Երկիր», «Ժամանակ», «Ժողովուրդ», «Իրավունք», «Իրատես դե Ֆակտո», «Հայացք», «Հայկական ժամանակ», «Հայոց աշխարհ», «Հրապարակ», ՉԻ, «Օրակարգ», «168 ժամ», «Գոլոս Արմենիի» և «Նովոյե վրեմյա» թերթերը:
