Ադրբեջանական APA լրատվական գործակալության փոխանցմամբ՝ Թուրքիայի մշակույթի ու զբոսաշրջության նախարար Էրթուղրուլ Գյունայը հայտարարել է, որ «Արաբական գարունը» բացասաբար է անդրադառնում Թուրքիայի զբոսաշրջային ոլորտի վրա:
Գյունայն այդ պլանում առանձնացրել է Սիրիան, որտեղ արդեն 13 ամիս է, ինչ տիրում է քաղաքական անկայուն իրավիճակ, ինչը չափազանց բացասաբար է ազդում 2012 թվականի զբոսաշրջային սեզոնի վրա.
«Արաբական գարնան արդյունքները Թուրքիայի համար թե՛ դրական էին, թե՛ բացասական: Նախորդ տարի զբոսաշրջիկների մի մասը Եգիպտոսի ու Թունիսի փոխարեն իրենց հանգիստն անցկացրին Թուրքիայում: Սակայն այս տարի Թուրքիան զգալի քանակությամբ զբոսաշրջիկներ կորցրեց Սիրիայում տիրող քաղաքական բարդ իրավիճակի պատճառով:
Այս տարվա առաջին երկու ամիսներին Թուրքիան ընդունել է 1.98 միլիոն զբոսաշրջիկ, ինչը 3.7 տոկոսով պակաս է՝ համեմատած նախորդ տարվա միևնույն ժամանակահատվածի հետ»:
