ԱՄՆ Հետաքննությունների դաշնային բյուրոն և Նյու Յորքի ոստիկանությունը սկսել են ակտիվ քննչական գործողություններ ծավալել 33 տարի առաջ 6-ամյա Իտան Փեթցի խորհրդավոր կերպով անհետացման գործով: Դեպքը այն ժամանակ ցնցել էր ողջ երկիրը: Իտանի անհետացման օրը՝ մայիսի 25-ը, ԱՄՆ-ում հայտարարվել է Անհետացած փոքրիկների ազգային օր:
Այդ օրը Մանհեթենի Սոխո շրջանում բնակվող Իտանի ծնողներն առաջին անգամ թույլ տվեցին փոքրիկին ինքնուրույն դպրոց գնալ ավտոբուսով: Կեսօրին, երբ երեխան տուն չվերադարձավ, մայրը ահազանգեց համապատասխան մարմիններին: Արդեն երեկոյան, 100 ոստիկան և կամավոր փնտրում էին Իտանին: Անարդյունք որոնումները շարունակվեցին մի քանի շաբաթ: Նույնիսկ իրավապահները փոքրիկի լուսանկարը սկսեցին փակցնել կաթի տուփերի վրա՝ նրան գտնելու դեպքում բարձրաձայնելու խնդրագրով: Փոքրիկն այդպես էլ չգտնվեց:
2001 թվականին Նյու-Յորքի ոստիկանությունը գործը պաշտոնապես փակեց՝ Իտանին մահացած հայտարարելով: Երեխայի ծնողները կարծում են, որ նրա մահվան գործում առնչություն ունի ոմն Խոսե Ռամոսը՝ երեխայի դայակի ծանոթը: 2004 թվականին ընտանիքը պարտվեց նրա դեմ դատական պայքարում: Եվ քանի որ Ռամոսը մշտապես հերքել է իր մասնակցությունը Իտանի անհետացման գործում, նա այդպես էլ քրեական պատասխանատվության չենթարկվեց: Այժմ նա Փենսիլվանիայի բանտերից մեկում է՝ մեկ այլ գործով. նա իր պատիժն է կրում երկու տղաների սեռական բռնության ենթարկելու մեղադրանքով:
Որոնումները վերսկսվել են: Դետեկտիվները ուսումնասիրություններ են անցկացնում շենքի նկուղում, որը գտնվում է Փեթցերի տան մոտ: Այնտեղ 30 տարի առաջ փայտամշակման արհեստանոց է եղել: Իտանին որոնողները հույս ունեն գտնել նրա ոսկորները կամ շորերը:
