Վ. Գաբրիելյան. Պատշաճ հարկահավաքումը մշտական խնդիր է

Այսօր ֆինանսների նախարար Վաչե Գաբրիելյանը ասուլիս էր հրավիրել` ներկայացնելու համար 2011թ. ֆինանսերի նախարարության գործունեության միջոցառումների ծրագիրը և գերակա խնդիրները: Նախարարը մի քանի ուղղություններ առանձնացրեց: Առաջինը վերաբերում է պետական ծախսերի կառավարման արդյունավետության բարձրացման նպատակով ծրագրային բյուջետավորման ներդրման ուղղությամբ իրականացվող բարեփոխումներին: 2012թ. բյուջետային ֆինանսավորման հայտերը կներկայացվեն նոր կառուցվածքի և նոր դասիչների համակարգին համապատասխան: Ներդրվելու է նաև պետական պարտքի գրանցման և հաշվառման միասնական էլէկտրոնային համակարգ: Մյուս գերակա խնդիրը վերաբերում է շշալցված և փաթեթավորված մի խումբ ապրանքների շրջանառության ծավալների հաշվառման համակարգի կանոնակարգմանը: Բացի այդ, նախատեսվում է թարգմանել աուդիտի ստանդարտները: Հիշեցնենք, որ նախորդ տարի ամբողջությամբ թարգմանվեցին հաշվապահական հաշվառման միջազգային ստանդարտները: Այս տարի ֆինանսերի նախարարությունը կառավարություն կներկայացնի նաև «կամավոր կենսաթոշակային ֆոնդերի ակտիվների ֆինանսական գործիքներում ներդրման քանակական և արժութային սահմանափակումները սահմանելու մասին» ՀՀ կառավարության որոշման նախագիծը: Նախարարը նաև շեշտեց, որ շարունակում է գերակա խնդիր մնալ հարկեր/ՀՆԱ հարաբերակցության մեծացումը: «Բնականաբար մշտական խնդիր է հարկերի պատշաճ հավաքագրումը: Ֆինանսների նախարարությունը բնականաբար ամբողջովին ուշադիր կաշխատի պետական եկամուտների կոմիտեի հետ այդ ուղղությամբ, հարկային վարչարարությունը բարելավելու ուղղությամբ, որպեսզի մենք ունենանք հարկային եկամուտների բարելավում: Մենք կաջակցենք ՊԵԿ-ին հարկերի տեսակարար կշիռը ՀՆԱ-ում բարձրացնելու, առավել արդյունավետ համակարգ ստեղծելու նպատակով»,- ասաց նախարարը: