Չինացիներն իրենց նոր ինքնաթիռի տեխնոլոգիաները վերցրել են խփված ամերիկյան ինքնաթիռից

«Առաջին լրատվականն» արդեն հայտնել է, որ Չինաստանը ստեղծել է անտեսանելի կործանիչ ինքնաթիռ, որի փորձարկումներն իրականացրել է օրերս:
Ինչպես հայտնում է Associated Press գործակալությունը, չինական անտեսանելի J-20 կործանիչ օդանավը ստեղծվել է ամերիկյան նմանատիպ ինքնաթիռից վերցված տեխնոլոգիաների հիման վրա: Գործակալության հաղորդմամբ, չինացիներն այդ տեխնոլոգիաները ստացել են 1999 թ. Հարավսլավիայում խփված ամերիկյան F-117 Nighthawk անտեսանելի ինքնաթիռից:
Stealth տեխնոլոգիայով ստեղծված F-117 իքնաթիռները դժվար տեսանելի են ռադարային սարքերի համար, սակայն հարավսլավացիներին հաջողվել էր հայտնաբերել և խփել այն: Սա պատմության մեջ առաջին դեպքն էր, որ նման ինքնաթիռ էր կործանվել, ինչից անմիջապես օգտվել էին չինացիները:
Այն, որ J-20 չինական ինքնաթիռիում օգտագործվել է Stealth համակարգը, համոզված է նաև խորվաթական բանակի գլխավոր շտաբի նախկին պետ Դավոր Դոմազեթ-Լոսոն, որը հայտնել է, թե այն ժամանակ իրենք տեղեկություն են ունեցել, որ գաղտնի այդ տեխնոլոգիաները սերբերը փոխանցել են չինացիներին: