ՀՀ կառավարությունն այսօր նիստում հաստատել է «2012-2014 թթ. գյուղատնտեսական կենդանիների հիվանդությունների լաբորատոր ախտորոշման և կենդանական ծագում ունեցող հումքի և նյութի, բույսերի կարանտինի, մշակաբույսերի պաշտպանության միջոցների լաբորատոր փորձաքննության իրականացում» ծրագիրը։
Ավելի վաղ ընդունված որոշումներից մեկի փոփոխությամբ կառավարությունը կարգավորել է անասնաբուժական պետական հսկողության ենթակա բեռների և սննդամթերքի ներմուծման փուլում սահմանային պետական վերահսկողությունը։
Վարչապետ Տիգրան Սարգսյանը նշել է, որ 2012 թ-ին այս ծրագրերն իրականացվում են պահուստային ֆոնդից միջոցներ հատկացնելով։ «Ըստ էության, սրանք մեզ համար պիլոտային ծրագրեր էին, որոնք ցույց տվեցին իրենց արդյունավետությունը: Մենք արդեն քննարկում ենք միջնաժամկետ ծախսային ծրագիրը և դրանից անմիջապես հետո պետք է կազմենք 2013 թ. պետական բյուջեի նախագիծը»,- ասաց Տ.Սարգսյանը` գյուղնախարարին հանձնարարելով 1 ամսվա ընթացքում կառավարության հաստատմանը ներկայացնել ծրագիր, որը կներառի գյուղատնտեսության օժանդակության բոլոր մեխանիզմները, որպեսզի 2013-ի բյուջեն կազմելիս նաև դա հաշվի առնվի:
Կառավարությունը որոշել է Գերմանիայի միջազգային համագործակցության ընկերության «Համայնքների զարգացման խրախուսում» և «Համայնքային տնտեսական զարգացում» ծրագրերի գույքը հանձնել նշված ծրագրերի գործընկեր կազմակերպություններին և համայնքներին, ինչը կնպաստի դրանց տեխնիկական ապահովվածությանը, ՏԻՄ-երում էլեկտրոնային համակարգերի ներդրմանն ու միասնական տեղկատվական տարածության ձևավորմանը։
